ЧIал къавхьуну ччиманаща ккаккан бюхъантIиссар имам Шамиллул арс Жамалуттиннул ва оьрус душ Лиза Оленинал ччавриясса аьрали тарихрал «Аманат» тIисса драма. Ванил сюжетрал гьанулун лавсун бур мяйжаннугу хьусса ччаврил хавар.
Киноравусса ишру хъанай бур ХIХ аьсрулул дачIиннуй, Ккавкказнал дяъвилул мяйжаннугусса эпизод лавсун. 1839-ку шинал имам Шамиллул цала хъунама арс уллуну ур паччахIнан аманатрай – яни, ширишилун (заложникну). Император Николайл чIава ясир цала къулагъасралун, аякьалулун лавсун ур. Жамалуттин дуклай ивкIун ур кадетуллал корпусраву. Офицернан эшкьи хьуну дур оьрус душних. Шинну ларгун махъ жагьил цIунилгу зана хьуну ур Ккавкказнавун. Ванан багьну бур кувннищал кув талатисса кIира дунияллул, кIирагу цанна аьзизсса, цумур язи дугьанссарив къакIулну, дянив ацIан. Автортал чIурчIав дуллай бур ва кино, дяъвилиясса дакъашиврий, дяъвилул ахир дуван ччисса инсаннаясса душиврий.
Фильмрал генерал продюсер, сипталул ва сценарийлул автор ур Шамил Жяъпаров. Кино ласлай хьуну дур 4 шин, ласлайгу бивкIун бур Санкт-Петербурграй ва Дагъусттаннайгу. Яла агьамми роллу дургьуну бур жагьилтал. Жамалуттиннул роль дургьусса Амин Хуратов тIий ур:
– Нагу, ва кинорал агьамма герой куна, ялапар хъанай ура кIилийнусса дунияллий: ттуву экьинай бур адыгтурал оьтту ва славяннал оьтту. Мунияту нагу буруккинттарай икIара ттула чIиримур ватандалий ва хъуннамур ватандалий хъанахъисса иширттал ялув. Нагу хIарачат буллай икIара ттулва оьрмулуву вай кIирагу дуниял цачIун дуван, – тIий.
Фильмраву Аьрасатнал цIа дурксса актертурава гьурттуну бур Екатерина Гусева, Андрей Соколов, Федор Лавров ва цаймигу.
