Цила чIумал Шахьуйннал шяравасса Маммаев Буттал ва Уммукусумлул бивкIун бур 4 оьрчI: хъуна-хъунама АбутIалиб; хъирив кIива душ – Зузу ва Аминат; ва чIана-чIивима – ПаттахI. АбутIалиблул ва ПаттахIлул дянив шиннардил хъун-чIивишиврул манзил биялсса бивкIун бур. ПаттахIлун цала хъунама уссу ляличIинува ххирану ивкIун ур. ПаттахI чIавану унува АбутIалиб лавгун ур дяъвилийн.

1944-ку шинал дайдихьулий хъунама сержант АбутIалиб Маммаев Ленинград душманнаща мурахас буллай талай ивкIун ур, лайкь хьуну ур «За оборону Ленинграда» медальданун. Ленинградрахлусса талатавриву оьрмулуцIагу хьуну ур.

Ванал «похоронкагу», дяйкьуну, шяравун къадирну дур, ичIуваминнан, гъан-маччаминнан кIулну къабивкIун бур ва увччусса кIану. Уссу ивкIуну махъ ПаттахIлул цимилгу кьаст лархIуну дур аьрайн гьан, амма ва, оьрмулул шиннайн бувну, къаувцуну ур. Дяъви къуртал хьуну махърив ПаттахIлул биялсса хIарачат бувну бур цала хъунама уссу увччусса кIану кIул буллай, Лакрал райондалул военкомну зузисса цала ссурахъу Шакуев ХIасанхIусайннуйхчилгу, цайми-цайми ххуллурдайхгу. Амма, уссил Ленинградралу жан дулаву бакъасса, цамур цичIав кIулну бивкIун бакъар.

1954-ку шинал ПаттахIлул ва Шамайл кулпатраву увну ур арс, ванан цIагу дирзун дур АбутIалиб. 1988-ку шинал, Дагъусттаннал обкомпартиялул тIайла увккун, АбутIалиб лавгун ур Москавлив партиялул Лаваймур школалий дуклан. Тихун нанисса арснахь ПаттахIлул тавакъю бувну бур, дяъвилий ивкIусса цала уссия ци-бунугу кIул буванмур бува куну. Москавлив дуклай барз ва бачIиксса хьуну махъ, цащалва дуклакиминнащалгу иялну кIул хьуну, ванан бавну бур цамур группалуву ушиву Подольск шагьрулий зий ивкIсса Сергей тIисса жагьил. Ва шагьрулий бивкIун бур СССР-данул Обороналул министерствалул архив. АбутIалиблул ванахь цIухху-бусу бувну бур.

Ва диркIун дур ссутнил чIун. Хъиривмур шинал май зуруй семинар дарсирдай щяивкIсса АбутIалиблун ккав­ккун ур нузал ххярацулттивух цайна оьвтIисса Сергей. СсаятучIав хаваргу бакъа, дарсирая увксса АбутIалиблул хьхьичIун Сергейл чагъар бувгьуну бур. Урувгсса: архивравасса справка, цийгу чивчусса пулансса шинал увсса хъунама сержант Маммаев АбутIалиблул Ленинградрахлусса талатавриву виричунал кунна жан дуллу­ссар 1944-ку шинал ва увччуну уссар Ленинградуллал областьрайсса Красное Село поселокрай Уссушиврийсса гьаттаву тIий. Дарсирдая махъ общежитиялия АбутIалиблул оьвкуну бур МахIачкъалалив нитти-буттачIан, бувсун бур буттахь цала хъунама уссу увччусса кIану лявкъушиву. Ва хавар цанма бавсса ПаттахIлул, аьпа бивул, ца-кIира секундрайсса пахъ агьнугу ивкIун, телефондалул трубка бивхьуну бур. Ца-кIива гьантта лавгун, майрал 8-нний, ПаттахI увкIун ур Москавлив. Майрал 9-нний кIюрххил, ссят 9-10 хьуну, вай бивну бур Ленинградрайн, миччагу электричкалий, Красное Село поселокрайн.

Ва диркIун дур 1989-ку шин, Ххувшаву ларсун 45 шин хъанахъисса кьини. Хъинну чIявусса инсанталгу бивкIун бур лагма-ялтту. ЦIухху-бусу буллай, ляркъуну дур вайннал цайминнуву цанна аьркинмур Уссушиврийсса гьав. Ти­кку диркIун дур 15-нния ливчусса инсантурал цIарду чирчусса ула. Суратругу рирщуну, гьаттая аьрщарал кIиямагу цащалва лавсун, вай махъунмай бувкIун бур. АбутIалиблул чагъар чивчуну бур Ленинградуллал областьрал Красносельский райондалул военкоматрайн, укун-укун, жун жула уссил, буттауссил гьав ляркъунни, тавакъюри ванал цIагу абад даву тIисса. Жаваб дуркIун дур цан кIулли та гьаттаву хъинну чIявусса вирттал бувччуну бушиву, амма тиккумур ула дяъви къуртал шайхтура лархъсса душиву, мунияр махъгу чIярусса цIарду ялун лирчушиву хIисавравун лавсун, та кIанай цаппарасса шиннардивун цIусса мемориал бувантIишиву бусласисса, махъ ялун ливчуминнал цIардугу цIурцIуну. Мяйжаннугу, ца-кIира шинавун ПаттахIлучIан бувкIун бур тихасса чагъар, цIуну бувсса мемориалданул суратругу дусса.

Гьашину тIурча, цIунилгу ивунни АбутIалиб цала бутта­уссу увччусса Уссушиврийсса мемориалданийн.
– Хъинну ххуйну бакьин бувну бия, Абадлийсса цIугу дия, га чIумал ца-кIира фамилия диркIсса, цIана цимиягу азара инсаннал цIарду дия. Ва оьрмулуву нава бувсса цамур бакъахьурчагума, на ттунна цIа дирзсса буттауссу ув­ччусса кIану, ванал гьав ляркъуссар куну, мунийну ттула инсаншиврийсса, арсшиврийсса, уссил арсшиврийсса бурж би­ттур бувссар куну учара, – тIий ур АбутIалиб. – «Невский Пятачок» тIисса Мемориал комплекс бия Нева неххацI, дяъвилул чIумал оьхIалсса талатавуртту най диркIсса, хъинну чIявусса инсантал ливтIусса кIанттай. Нева неххал дазучIан бияннин, 800-лий метрардая ливчусса манзилданий бур Уссушиврийсса гьаттардил цикссагу мукьмурцIурду (квадратру). Гьарцагу мукьмурцIулий чивчуну бур гиву цими талатала увччуну уссарив, дия 200, 300, 500 инсан увччусса, дия 1000-ллийсса талаталт ва командиртал бувччусса. Гьарца сияхIравугу дия дурагу ацIнияхъайсса, кьунияхъайсса цIарду-фамилиярду чирчуну, ч1явумирив – цIа-бакI кIул дуван къавхьусса, кIул ба­къасса вирттал. Тий-ший Уссу­шиврий­сса гьаврду, дянийх – Интернационал аллея бия, цийгу хъунисса-мюрщисса чарттай чивчусса Аьрасатнал сайки гьарца региондалул чулуха Ленинград буручлай жанну дуллусса цала ватанлувтурал цIанийсса барчаллагьрал махъру. Вайннувух Дагъусттаннал чулухассагу бия, – буслай ур цалва аьрххилия Мах1ачкъала шагьрулул Избирательный комиссиялул председатель, Паччах1лугърал Думалул депутат Жамалуттин Х1асановлул кумагчи АбутIалиб Маммаев.
«Дяъви къакъурталссар, ма­хъа-махъсса солдат къаув­ччуссаксса», – куну бур ччянива бюхттулсса полководец Суворовлул. Абадлий мина чув хьуссарив къакIулсса талаталт АбутIалиб Маммаевлул бувсъсса хаварданувугума цикссагу бур.

Га хьхьичIвама АбутIалиб кунмасса вирттавран, гайннал дурсса чувшивурттан бивкIу бакъассар, ва цIанасса АбутIалиб кунмасса чиваркI, патриотътал буссаксса.
Дуниял паракьат хьуннав, хьумуния тIийнма личIаннав.