Май зурул 18-нний «Огонёк» тIисса оьрчIансса лагерьданий Дунияллул халкьуннал дянивсса жагьилтурал динийсса IХ -мур форумрал даву дайдирхьунни.

Гьар шинах кунма, гьашинугу гьуртту хьунни паччахIлугърал органнал вакилтал, элмийсса ва жяматийсса ишккаккулт, динчитал, билаятрал цайми регионнаятусса хъамал. Аьрасатнал ва Дагъусттаннал гимнру увкуну мукьах, махъ лавхъуна Дагъус­ттаннал ХIукуматрал хъунаманал хъиривчу Рамазан Жяъпаровлул. Ванал кIицI лавгунни форумрал хъуннасса даву дуллалишиву личIи-дичIисса диннал агьулданул дянивсса дусшиву цIакь даврил ххуллий.

Дур­ккунни вава мяъна-мурадрайсса, форум агьалинал дусшиву цIакь дуллалисса ва терроризмалун бару буллалисса даву хъана­хъишиврий чIурчIав дуллалисса, Миллатирттал иширтталсса буллалисса федерал агентствалул каялувчи Игорь Бариновлул телеграммагу.

Да­гъусттаннал Муфтинал цIанияту ихтилат буллай, ванал кумагчи МухIаммадрасул Саадуевлул бувсунни Магъриб цIуницIа жулва жагьилтурал мяърипатрая архмур ппив дувансса мурадрай гьаз хьуну бушиву, амма миннал суккушинна ссайнчIав къадуккантIишиву, жагьилтурал тарбиялул гьанурду цIакьсса бушиву. Форумрай ихтилатру бунни цайми диннал вакилтуралгу, миннавух Къалмукьнавасса хъамаличу, буддизмалул идаралул вакил Сергей Киришовлул, ягьудинал диндалул вакил, ягьудинал ккураннал Аьрасатнал департаментрал хъунама Аарон Гуревичлул.

Форумрал лагрулий Дагъусттаннал миллатирттал ва динийсса иширтталсса буллалисса министр Энрик Муслимов хIаласса инсантурал бувгьунни мурхьругу ти­ккува, лагерьданий. Вагу хьунни агьали динну ва миллатру личIи къабуллай яхъанан аьркиншиву чIалачIи буллалисса экологиялул ххуйсса акция.