[dropcap]М[/dropcap]ай зурул 12-нний МахIачкъалаллал 11-мур гимназиялий хьунни Дагъусттаннал миллатирттал мазру, культура, искусство ва тарих лахьхьаврин хас дурсса Республикалул педагогтурал сиптардал фестиваль. Фестиваль ва гимназиялий дуллалисса нахIакьдан бакъая. Республикалул 11-мур гимназия хъанахъиссар Дагъусттаннал миллатирттал мазру куртIну лахьлахьисса центрну.

Фестивальданул сакиншинначитал хьунни ДР-лул КIулшивуртту дулаврил министерство, ДР-лул Ниттил мазурдил ва литературалул дарсирдал учительтурал Ассоциация. Шикку гьуртту хьунни Республикалул кIулшивуртту дулаврил идарарттал каялувчитал, педагогтал, культура дуруччаврил аралуву зузисса республикалийсса цинявппагу миллатирттал чулухасса вакилтал.

Гимназиялул спортзалдануву тIивтIуну бия Дагъусттаннал миллатирттал майданну. ХIадур дурну дия авадансса программа. Фестивальданул программалул лагрулий хьунни пленарный заседаниелул давуртту, дирхьунни дарсру. Лакку мазрайсса дарс дирхьунни МахIачкъала шагьрулул 31-мур школалий лакку мазрал дарсру дихьлахьисса учительница Жавгьарат Исяевал.
«Дагъусттаннал культура, аьдат-эбадатру лахьхьаврин хас дурсса мероприятияртту даврийну оьрчIан ниттил мазрал дарсру лахьхьаврихсса гъира ххишала шай.

[dropcap]Ш[/dropcap]икку гьуртту хьусса учительтуралгу ккаккан дунни дарсирдай цалла ишла дайсса методикалул кьяйдарду, кувннал кувннащал кIибавчIунни даврил опыт», – увкунни гимназиялул директор Зугьра Дибировал.
Фестивальданий ва ххуллухгу, муданма кунма, лакрал миллатрал культура, багьу-бизу ккаккан буллалисса ххаллилсса майдан сакин бувну бия МахIачкъала шагьрулул 16-мур школалий лакку мазрал дарсру дихьлахьисса учительница ПатIимат Аьлиевал. Шикку хIасул бувсса майданнайн я щайхту исват хъанай бия маз буруччавриву ва миллатрал культура ядавриву учительтурал бияла хъунмасса бушиву. Шиккува кIицI лаган, фестиваль лахъсса даражалий тIайла дуккан, ччянива хIадур хъанай, учительтал ва дуклаки оьрчIру лагма лаган буллай, хъунмасса хIарачат бувну бия ПатIимат Аьли­вал. Фестивальданийсса цинявппа миллатирттал майданнава ца яла я бацIанмургу бия лакрал миллатралмур майдан.

[dropcap]Ш[/dropcap]и­кку дия лакрал ужагъирттай, багьу-бизулуву хьхьичIара ишла дуллай бивк1сса, утти нажагьссанначIа дакъа къалирчIсса матахI. Хъамаллурал хьхьичI тIивтIуну бия, дукьра хIанттия тIайла хьуну, жалиндалул бакъухърайн дияннинсса, личIи-личIисса аслийсса лакку дукрардал авадансса ссупра. Ла­кку дукрардал ссупралухун бавтIсса хъамал цIухху-бусу буллай бия ми дайсса куццул хIакъираву.
Фестивальданий гьуртту хьусса учительталгу, бувкIсса хъамалгу ларххун бия миллатирттал янна-ка, ца даркьуну дия душру-хъанний бавахъал буттукьирттавасса цаннияр ца авурсса лачакру.
Ахирданий фестивальданул жюрилул лавайсса кьимат бивщунни ва барчаллагь баян бунни байран хIадур дан захIмат бивхьусса учительтурайн ва дуклаки оьрчIайн. Дагъусттаннал КIулшиву дулаврил ва элмулул министерствалул чулухасса ХIурматрал грамота дуллунни вай иширттавух дакIнийхтунусса ва чялиш­сса гьурттушинна дур­сса ПатIимат Аьлиеван.