Жула каратистътурал медаллу

Дагъусттаннал Каратистътурал СКФО-лул первенствалий ва Аьрасатнал дуклаки оьрчIал спартакиадалул кIилчинмур ятIапрай 32 медаль дурххунни. Бяст-ччал хьунни Ессентуки шагьрулий. Муния бувсунни Республикалул Спортрал министерствалул прессалул къуллугърал. Округрал первенство хьунни кадетътурал, юниортурал ва чIаважагьилтурал дянив. Спартакиадалий гьуртту хьунни 14-15 шинавусса 220 спортсмен.

Дагъусттаннал каратистътал ацIния кIийла лавхъунни хIурматрал пьедесталданул яла лахъмур шачIанттуйн, 9 спортсменнал ларсунни арцул заварду, 11-ннал дурххунни чарвитул медаллу.
Бяст-ччаллаву ххув хьунни Аьбдулкьадир МахIаммад­аьлиев,Тамирлан МахIаммадов, ХIажи ХIажиев, Даниял ТIал­хIатов, Роман Денисов, Уллубий Мамашев, Алхас Алхасов, Бадави МахIаммадов, ХIажилав МахIаммадов, Зайнаб ХIамзатова.
Дагъусттаннал цачIундур командалул бувгьунни цалчинмур кIану.