Май зурул 14-нний УнцIукIуллал райондалийсса Яруссаннал Къуйсу неххал зумарду марцI дуллалисса субботник хьунни, щалвагу Аьрасатнал волонтертурал экологиялул «Вода Россия» тIисса акция хIисаврайсса.
Майданское тIисса шяраваллил чIаравсса Ирганай ГЭС-рачIан бувкминнавух бия Лакрал ва Ккуллал районнаясса агьлугу. Аьмнурив 19 райондалул агьлу гьуртту хъанай бия. Субботникрай гьурттушинна дунни Дагъусттаннал ХIукуматрал хъунаманал хъиривчу Нариман АьбдулмутIалибовлул, тIабиаьтрал ресурсирдал ва экологиялул министр Ибрагьим Ибрагьимовлул, Аьрасатнал тIабиаьтрал министерствалул щинал ресурсирдал департаментрал хъунама Роман Минухиннул, Щинал хозяйствалул комплексрал центрданул директор Илья Разбашлул, актриса ва акциялул амбассадор Юлия Михалковал.
«ХIакьину жува «Вода России» акциялул хъиндайдихьу дуллалиссару Дагъусттаннай. Жу ва экологиялул акция наниссаксса хIаллай, волонтертурал армия хIасул буварду, дукIу дянивну ца миллион инсантурал гьуртту хьуссия ва 70 азарва КамАЗру ччюрклил бавтIссия», – увкунни Роман Минухиннул. Нариман АьбдулмутIалибовлулгу кIицI лавгунни мукьазарунниха ливчусса нехру экьи нанисса Дагъусттаннал укунсса акциярдал агьамшиву хъуннасса душиву, ялу-ялун туристъталгу республикалийн ила бичлай бухьувкун, неххардил зумардугу марцIну, лазилавкьуну дикIан аьркиншиву, тIабиаьтгу аякьалий ядуллан аьркиншиву. Шаназарунниха ливчусса инсантал гьуртту хьусса ва субботникрай зувиллийсса КамАЗру ччюрклил бавтIун бур неххал зумардая.
