Лакрал балайрдал мяъдан

Ларгсса нюжмардий Лакрал театрдануву хьунни Аьрасатнал магьирлугърал бусравсса ишккакку, хьхьичIунсса композитор Мазагьиб Шарипов дунияллийн увккун 85 шин там шаврин хас дурсса аьпалул концерт.

Мазагьиб Шарипов дакI­нийн утан бувкIун бия ДР-лул культуралул министр Зарема Буттаева, Халкьуннал Мажлисрал депутатътал Артур Исрапилов ва Камил Давдиев, республикалул магьирлугърал ишккаккулт, дус-ихтивартал ва гъан-маччами.

Аьпалул мажлис байбивхьуна Лакрал радиолул редактор Тамара Закарьяевал хIадур дурсса Мазагьиб Шариповлул оьрмулун ва творчествалун хас дурсса документал фильм ккаккан даврия.
Муния махъ Зарема Буттаевал кIицI лавгуна Мазагьиб Шарипов ивкIшиву халкьуннал балайрдахсса гьавасрал ясир увсса балайчи, музыкант, композитор, чIявусса жагьилсса балайчитурал гьунарду аьч бувсса, ми илданун кIул бувсса педагог. Цал бусса оьрму лавгун бур халкьуннал балайрду машгьур буллай. Сакин бувну бур творчествалул коллективру.
– Ссаха зурчагу, гьарцагу цала давриву Мазагьиб Шамсуттинович лахъайва бюхттулшиврийн, мунийну сийлий ия творчествалул илданул дянив, хIалал бувна хIурмат ва халкьуннал чулухасса дазу да­къасса ччаву. Дагъусттаннал музыкалул магьирлугъ багьавай пахрулий ду­ссар Мазагьиб Шарипов кунма гьарца чулуха итххявхсса, кьуват бусса творческий личностурая. ХхюцIалла шинал творчествалул ххуллий ванал чивчуну бур арулттуршунниха ливчусса балайрду. Ми балайрдугу жунма баллай бур личIи-личIисса мазурдий. Вай жунма ххира хьу­ссар жула цIанихсса балайчитурал – Мариян Дандамаевал, Мирханум Шариповал, Бурлият Ибрагьимовал, Камалуттин МахIаммадшяпиевлул, Бурлият Эльмурзаевал ва чIявусса цаймигу гьунар бусса балайчитурал тIий. Мазагьиб Шариповлул творчествалул ирсиравасса язими балайрду хIакьину ва мажлисрай учинссар Дагъусттаннал яла яргми ва цIанихми балайчитурал. Цалгу му ирс никирая никирайн тапшур буллай, халкьуннал аьпалуву абад бантIиссар, – увкунни цила ихтилатраву министрнал.
Мазагьиб Шариповлул кулпат Мирханум Зарема Буттаевал кIицI лавгуна хIакьсса зунттал хъамитайпалул эбратшиврий ва гьунар бюхттулсса балайчишиврий. Барчаллагь увкуна ванихь Дагъусттаннал музыкалул магьирлугърал хьхьичIунсса иш­ккаккул тIюва дуруччаврихлу, творчествалул ирс ябаврихлу.
Мазагьиб Шариповлул макьаннайсса балайрду Новруз Шахбазовлул каялувшиндаралусса халкьуннал инструментирттал оркестрданухун щаллу бувна: МухIсин Камалов­лул, Загьидат Муслимовал, Лариса ХIажиевал, Рукьият ХIамзатовал, Пат1имат Кьагьировал, Арслан Шагьмардановлул, Карин Кьадинаевлул, Нурианна Къаллаевал, Лакрал театрданул артистурал ва жагьил­сса балайчитурал, ЦIуссалакрал райондалул магьирлугърал зузалтрал.
Артур Исрапиловлул кIицI лавгуна, цала хъунмасса гьунарданух къаурувгун, Мазагьиб Шарипов ивкIшиву, творчествалул инсантураха лавхьхьуну, дакI кIюласса, ламусъсса, интеллигентсса инсан.
– Дагъусттаннал магьирлугъ хьхьичIуннай даврил ххуллий Мазагьиб Шариповлул бувсса захIматран багьа бищун захIматри. Мунал балайрду ттуршукурдай яхьунтIиссар, ми хIакьсса халкьуннал балайрдайн кIура бавну буну тIий, тамашачитурал цIу-цIусса никиран тIалавнугу, ххиранугу буну тIий. Вай балайрду чичаврийну Мазагьиб Шариповлул цалла цIа абад дурссар, – увкуна Исрапиловлул.
Камил Давдиевлул кIицI лавгуна Мазагьиб Шариповлул хIарачатрайну тIивтIуну бивкIшиву Гъумук оьрчIал музыкалул школа.
– Жува цинявппа, ва залдануву щябивкIцири, хъуни хьуссару Мазагьиб Шариповлул дакIнийхтунусса балайрдай. ЦIанихсса балайчитурал тIий бакъасса, жунма ми баллай бия Лакрал театрданул спектакллавугу. Шариповлул хъунна дур­ссар цIанихсса балайчитурал ник, хьхьичIунмай бувссар фольклорданул коллективру, дачин дурну ивкIссар агьалинан музыкалул кIулшиву дулаврил даву, – увкуна Камил Давдиевлул.
КIицI лавгуна халкьуннал творчество ядаврил ва хьхьичIуннай даврил цIаний бивхьусса захIматрахлу Мазагьиб Шарипов лайкь хьуну ивкIшиву «Душа Дагестана» тIисса Дагъусттан Республикалул ХIукуматрал премиялун.

– Аьчухсса, тяхъасса, гьунар бусса Мазагьиб мудангу ххари шайва цала уртакьтурал тIайлабацIурттая. ЦIанихсса композитор ушивруцIун ганал хъунмасса сахIналийн буккан бувссар хIакьину Дагъусттаннай цIагу, сийгу дусса балайчитал ва музыкантътал, – увкуна Дагъусттаннал Музыкантътурал союзрал хъунама Хан Башировлул.
Шалласу Шалласуевлул Мазагьиб Шариповлуйн увкунни «Лакрал балайрдал мякь къалиххайсса бакIщаращи»,– куну. КIицI лавгунни Мазагьиб Шариповлулуксса балайрду чивчусса, гьарца миллатирттал мазурдий цал балайрду тIутIисса композитор Ухссавнил Ккавкказнаву цама акъашиву. Мазагьиб ва Мирханум Шариповхъал дуэтрачIан дирсса дуэтгу Ухссавнил Ккавкказнаву хIакьинусса кьининийн цамур дакъашиву.

ДакIнийн бивчунни Мазагьиб Шариповлул макьаннай балайрду тIий тарихравун багьсса балайчитал: Мариян Дандамаева, Лайла Меджидова, Аьлиоьмар Аьлиев, Апанни КьурбанмахIаммадов.
Качар ХIусайнаевал кIицI лавгуна Мазагьиб Шариповлул цала оьрму бувтшиву яхI-къириятрай, ттангъа дакъа, дакI марцIну, миллатралгу, республикалулгу музыкалул ирс хьхьичIунмай баврил ххуллий.

– Мазагьиб дунияллия лавгссар кулпатран хъус-ххазина къакьабивтун, миллатран багьа бакъасса музыкалул ирс кьабивтун,– увкунни ванил.
Новруз Шагьбазовлул кIицI лавгунни Мазагьиб Шариповлул макьандалун партитура чичлачийни, дакI гьавасрал дуцIайсса диркIшиву.
– ХIайран хьуну икIайссияв Мазагьиблул гьунарданий, интеллигентшиврий. Муксса ламусъну гъан шайва га ттучIан: «Гьай, балики, ва макьан вин ххуй дизан, вичIи дишиннав?» – тIий, багъишла ити тIисса куна. Ганал макьаннурив ххуй къадизансса, дакIнин асар къахьунсса царагу дакъассар, – увкунни Шахбазовлул.