Итникьини МахIачкъалалив гастроллай бувкIун бия Къалмукьнавасса оьруснал драмалул ва комедиялул театр.
Лакрал театрданул сахIналий вайннал хъунмасса тIайла­бацIулущал кIийлва ккаккан бунни Леонид Филатовлул пьесалиясса мюзикл «Сказ про Федота-стрельца».

Спектакль байбишин хьхьичI Лакрал театрданул каялувчи Бадрижат МахIаммадхIажиевал, хъамаллурахь ча бувкругу куну, барчаллагь увкунни гастроллайнусса дахIаврихлу. Дагъусттаннал Культуралул министерствалул чулухасса Барчаллагьрал чагъар буллунни Къалмукьнал оьруснал театрданул хъунама директор Виктор Хаптахановлухьхьун. Ваналгу барчаллагь увкунни Лакрал театрданул каялувчитурахь, цала коллективращал дусшиврул ламу тIитIин цалчин ша ласаврихлу. КIицI лавгунни ттигъанну Лакрал театрданул труппалул бюхттулсса даражалий ккаккан бувшиву Шекспирдул «Укрощение строптивой» ва Элиста шагьрулул агьали ялугьлай бушиву цIу-цIусса хьунабакьавурттах.

«Сказ про Федота-стрельца» мюзиклданул премьера хьуну, бур 2021-ку шинал. Театрданул капитальныйну цIу буккан бувну бур кьура шинал хьхьичI Аьрасатнал театрал дунияллий лайкьсса кьимат хIалал бувсса, цала репертуардануву бусалардавун багьсса спектакль. Та чIумал ва хьуну бур Аьрасатнаву цалчин­сса мюзикл.
2000-ку шинал мюзикл агьам­сса иширан ккалли хьуну бур Йошкар-Олалий ларгсса Дунияллул халкьуннал дянивсса оьруснал театрдал фестивальданий.
2001-ку шинал Вологдалий хьусса «Голоса истории» тIисса щалагу Аьрасатнал мукьилчинмур театрал фестивальданий мюзикл лайкь хьуну бур шанма дипломран – ца режиссуралухлу, кIива — яла ххуйми роллахлу, адаминал ва хъамитайпалул.
Яргсса хьуну бур щала цIусса составрал бивхьумур спектакльгу. Ядурну дур Филатовлул мукъул куртIшиву ва чIумуя хъар дакъасса сатиралул агьамшиву. Режиссернал гьунарданийну спектакль ишан дуллай бур хIакьинусса кьинилийн.

Оьруснал халкьуннал ч1яву-сса магьран аьдатсса дур спектакльданул сюжет: къалмакъал ххирасса паччахIнан ччай бур цайна дакI тIайласса чIатIарак1 риту Федотлул кулпат — аьнтIикIа Маруся цахухва гьан бан. Ганай биттур бан къашайсса буржру бихьлай, цаятува цува гьан ан ччай ур. Амма тIайлабацIу даин ччаврил ва тIайламунил чулий бур.
Спектакльданул режиссер – Аьрасатнал магьирлугърал бусравсса ишккакку Борис Манджиев.
Композитор – Къалмукьнал магьирлугърал бусравсса ишккакку Аркадий Манджиев.

Гастроллал лагрулий «Дагестан» РИА-лул площадкалий хьунни театрданул директор Виктор Хаптаханов ва агьамми роллу щаллу дурсса актертуращалсса пресс-конференция. Микку ихтилат бия театрданул репертуардания, гастроллал даврия, Лакрал театрданущалсса дусшиврия.
Вай Лакрал ва Къал­мукьнал театрдал кувннал кув­нначIансса к1илчинсса гостроллу хъана­хъиссар.