Апрель зурул 28-нний Къизилюртуллал райондалийсса Султанянгиюртуллал(Хъанардал) ХIажи Бугъановлул цIанийсса 2-мур школалий 10-мур классраву дуклакисса ПатIимат Гарушевал ххассал унни къанавравун оькьлакьисса чIивисса оьрчI. Ва виричусса душ бур Хъанардал шяравасса.
[dropcap]В[/dropcap]а иш хьусса кьини ПатIимат дарсирдая шаппай най бивкIун бур. Гьавалул тагьар даххана хъанай, дуниял лачIун кунна дуну, гъарахьхьун къабирияншиврул, анавар буклай бивкIун бур цуппагу.
Къанаврал чIарах нанисса чIумал, баллан бивкIун бур ванин аьтIисса чIивисса оьрчIал чIу. Ша хIурхIа бувну, гъан хьуну бур къанаврачIан. Шикку ванин ххал хьуну ур гужну нанисса щинал чюхлилу, ссацIуннив лавчIун, аьтIунсса хIалвагу бакъа ливчIсса чIивитIу.
ПатIимат, анавархъинну лирккун хъарая луттирду бусса къахълагу, ххявххун бур щинавун. Къанав диркIун дур 2 метра ва ххишала куртIшиврул дусса, щингу диркIун дур дяркъусса. ТалихIиннаран, чIарах нанисса машиналул щупирнан ххал хьуну бивкIун бур щинавун ххявхсса душ. Щупир ва пассажир мугьлат бакъа левчуну бур кумагран. Вайннал личин бувну бур оькьлакьисса оьрчI ва му ххассал уван щинавун ххявхсса ПатIимат.
Д
ушнил дурсса виричусса даврин лайкьсса кьимат бишлай, Республикалул БакIчи Сергей Меликовлул барчаллагь баян бунни ПатIимат Гарушеван ва ва тарбия бувсса нитти-буттан.
