Гьашину «Демография» проектрал лагрулий Дагъусттаннайсса 36 азарунния ливчусса кулпатирттал ларсун дур цалчин бувсса оьрчIан гьарица зуруй дулун ккаккан дурсса арцу.
Шиккува кIицI лаган, ДР-лул ЗахIматрал ва социал лябуккулул министерствалул иширайну зузи дурну дуссар миллатирттал проект «Демография». Республикалий проектрал лагрулий дуллай буссар чIявусса ххуллурдайсса личIи-личIисса мероприятияртту. Миннувасса ца дур «Финансовая поддержка семей при рождении детей» тIисса, кулпатраву цалчин бувсса оьрчIан кумаг баву мурадрайсса.
Проектрал программалийн бувну, кулпатраву цалчин оьрчI бувсса ягу нину-бутташиву дан бувцусса оьрчIан ка-кумаг баву мурадрай, гьарица зуруй дулун ккаккан дурну дур хасъсса арцу. 2022-ку шинал республикалий миннул лагру дур 11 499 къуруш (2021-ку шинал дуссия 10 757 къуруш).
Гьашинусса шинал республикалий ва иширан федерал бюджетрава итадаркьуну дур 4 626,24 млн арцул. Дагъусттаннай ми арцу ларсун дур 36 616 кулпатрал.
ДакIнин бутанну, ми ласунсса ихтияр душиву 2018-ку шинал январь зуруя байбивхьуну бувсса оьрчIан ккаккан дурсса прожиточный минимумраяр лахъсса доходру дакъасса кулпатирттахь.
Март зуруй 2022-ку шинал ДР-лул ЗахIматрал ва социал лябуккулул министерствалул ми арцу дулаврил давриву чан-кьансса дахханашивуртту дурну дур. Мунийн бувнугу, 2022-ку шинал, январь зуруя байбивхьуну, миннул хIакъиравусса перерасчетру дан бюхъайссар.
