Ванил лавсун най буссия гуманитар элмулул ттугъ

Ванил лавсун най буссия гуманитар элмулул ттугъ

Ларгсса нюжмаркьини Лакрал театрдануву хьунни Аьрасатнал магьирлугърал лайкь хьусса зузала Гулизар Султановал аьпалул мажлис.

Аьрасатнал театровед, театрданул тарихчи, театрал критик, литературовед ва таржумачи дакIнийн бутан бувкIун бия театрал магьирлугърал хьхьичIунсса ишккаккулт, Мазрал, литературалул ва магьирлугърал институтрал (ИЯЛИ) зузалт, Султановхъал кулпатрал дус-ихтивартал, гъан-маччами.

Мероприятие тIитIлай, Лакрал театрданул каялувчи Бадрижат МахIаммадхIажиевал кIицI лавгуна ххюцIалунниха лирчу­сса шиннардил мутталий Гулизар АхIмадовнал цила гьунаргу, оьрмулул ва пишакаршиврул опытгу зузи бувну бивкIшиву Дагъусттаннал театр хьхьичIунмай баврил ххуллий. «Республикалийгу, Ухссавнил Ккавкказнавугу, гьай-гьай, буссар театроведтал. Амма Гулизар Султанова кунма, щала оьрму театрданун хас бувсса, миллатирттал театрдал тарих кIулшивруцIун, гьарца актёрная ва режиссерная, хIакьину жула дянив буминная бакъасса, жуятува батIул хьуминнаягу балжину бусан бюхъайсса пишакар цама акъассар» – увкунни Бадрижат МахIаммадхIажиевал.
Мероприятие дачин дурну бия Дагъусттаннал халкьуннал артистал Аслан МахIаммадов ва Саният Рамазанова.

Айгум Айгумов, Дагъусттаннал Театрал ишккаккултрал союзрал хъунама:
– Гулизар бия ляличIисса инсан. Циксса бусларчагу, бухкъалаганссар гания бусанмур. Га ба­къая анжагъ элмийсса давурттаха зузисса аьлимчу, га бия гьарца театр цила ужагъну хьусса, гьарца режиссернал ва актернал оьрму, хасият ва дакI кIулсса пишакар. Муксса дакI тIайласса инсан бияхха га цила пишалийн, ганил дурсса критика къаччан къабивкIун кьамул дайва. Гулизар лагаврищал ятин хьу­ссар Дагъусттаннал театрду. Жунма къакIулли гьунттий Гулизардух чув луглантIиссарув, увагу укканссарив Гулизардул кIану бугьансса инсан. Амма ва Гулизардуясса аьпа яхьунтIиссар гьарца театрдануву, гьарца режиссернаву, гьарца актернаву, гьарца спектакльдануву.
Эльмира Аьбдуллаева, ИЯЛИ-лул магьирлугърал тарихрал отделданул хъунмур:
– Гулизар Султанова бия Да­гъусттаннал гуманитар элмулул ттугъ лавсун най бивкIсса аьлимчу. Да­гъусттаннал театроведениялул гьану бивзмургу вари. Дагъус­ттаннал искусствоведениялул школа хIасул бувминнавугу хьхьичI ххуттай вая бусса. Дагъусттаннал театрдал тарих ва хIакьинусса кьинилул буруккинтту лахьхьаврил ялув ххюцIалла шинал мутталий Гулизар Султановал дурсса хъунисса хъиривлаявуртту яхьуну ду­ссар искусствоведениялул литературалул «мусил фондраву». Ганил захIмат жувагу мюнпатну ишла буллан аьркинссару.
Гулшан Хасаева, Мариян Илиясовал цIанийсса «Дараччи» фондрал каялувчи:
– ЧIявуссаннан ххай бикIай чак бай халичалий авцIума акъа ЗанначIан гъан къашайсса кунма. Цала бусса оьрму ватандалийн, ниттил мазрайн ва магьирлугърайн дакI тIайлану бувтмагу ЗанначIан гъанссар, Заннан ххирассар, Заннал ххуллий оьрму бувтманан ккаллиссар. Мукунминнавасса ца бия Гулизар Султановагу.
ХIакьину жува гания гъалгъа тIий буру ххаллилсса пишакар хIисаврай. Амма щала миллатрал ччаву хIалал даншиврул, ххаллилсса пишакар ушиву къагьассар, миллатрал ччаву хIалал даншиврул аьркинссар миллатрал оьтту-ттаркI, хасият цаву дикIан. Мукун­сса бия Гулизар, аслийсса лакку душ, хIакьсса зунттал душ.
Билаятрай магьирлугърал кьимат щяв багьсса шиннардий Гулизар АхIмадовна Мариян Чибиевнащал байбивхьуссар лакрал магьирлугъ ххассал дансса ххуллурду ляхълай. Ми давурттал дайдихьунугу хьуссар «ПартIу ПатIима» спектакль цIу буккан баву. Цалчин ПартIу ПатIимал роль дургьусса Гулизар Султановал, гьай-гьай, му ишираву хъуннасса хъар дургьуссар. Бусса оьрмулий цилагу дурурччунни ПартIу ПатIимал пикри-дакI.

Мариян Чибиевна жуятува лавгун махъ Гулизар хьуна жул чул бищай ттарцI. Ганил маслихIатру жун хъинну бучIи лякъайва.
Режиссер Ислам Казиевлул кIицI лавгуна Гулизар Султанова Аьрасатнал критиктурал, театроведтурал дянив бюхттулсса кьиматрай бивкIшиву.
Дагъусттаннал Ссихьрал театр­данул директор Аминат ЯхIияевал кIицI лавгуна Гулизар Султановал хъунмасса захIмат бивхьушиву, чIярусса давуртту чирчуну душиву Ссихьрал театр машгьур бансса – режиссертурая, актертурая, художниктурая. Хасну Ссихьрал театрданун ганил чивчусса пьесалиясса «Лехху, кьурукьрал оьрчI» тIисса спектакль хIакьинугу репертуардануву тIайлабацIу буну най бушиву.

Лазгиял театрданул директор Динара Эминовал кIицI давгуна Гулизар Султановал хъунмасса захIмат бивхьушиву Лазгиял театр­данул тарих чичлай. Жуж итабакьинсса хъиривлаявуртту чирчуну дур ганил Лазгиял театрдануя. Лазгиял театрданул итагу бавкьуну бур ганил давуртту цачIун дурсса жуж «Лезгинский театр в исследованиях Гулизар Султановой» тIисса.
Гулизар Султановал Дагъус­ттаннал магьирлугъраву, элмулуву ва жяматийсса оьрмулуву агьам­сса кIану бугьлай бивкIшиврий чIурчIав дуллалисса бия «Дагес­тан» журналданул хъунама редактор Марат ХIажиевлул, Аьра­сатнал магьирлугърал фондрал Дагъусттанналмур отделениялул хъунмур Луиза Гавриловал, профессор АьбдурахIман Халиловлул ихтилатругу.
Ккаккан дуруна Гулизар Султановал 80 шинал юбилейран хас дурну РГВК-лул журналист Хамис Шамиловал ларсъсса документал фильм.
Гулизар Султанован ххира­сса балайрду увкуна Арслан Шагьмардановлул, Саният Рамазановал, Аьбдул Мурадовлул, Зульфия Архилаевал ва Дагъусттаннал опералул ва балетрал театрданул солист Денис Федоренкол. Ахирданий Гулизар Султанова дакIнийн бутан бувкIминнахь барчаллагь увкуна душнил Светланал ва арснал Абакардул.

Читайте также: