МахIачкъалалив, Дусшиврул къатраву, хьунни «Инсан» тIисса ихIсандалул фондрал Дагъусттаннал Муфтиятращал ва Национал политикалул ва диндалул иширттал министерствалущал уртакьну хIадур дурсса ятинсса ва ялгъуз-гъаривсса оьрчIансса байран.

Ваний гьуртту хьунни республикалул муфтий щайх АхIмад-хIажи, муфтинал маслихIатчи Айна (ПатIимат) ХIамзатова, национал политикалул министр Энрик Муслимов, оьрчIал ихтиярдалсса буллалисса уполномоченный Марина Ежова ва цаймигу бусравсса инсантал. ПатIимат ХIамзатовал, оьрчIру барча буллай, кIицI лавгуна, Зумаритавал байран МухIаммад Идавсил (с.аь.с.) заманнайра цIакь хьусса байран духьувкун, жучIавагу мунил хIурмат бикIан аьркиншиву. Бувсуна Украиннайсса спецоперация сававну агьалинал дакIурдиву вас-ццах бушиву, аьралий бурж лайкьну биттур буллалисса вирттал цIуллуну шаппа-шаппай зана хьуния тIисса дуаьрду дуллай бушиву.
Энрик Муслимовлул оьрчIру барча бувна Дагъусттаннал БакIчи Сергей Меликовлул цIанияту. Марина Ежовал увкуна: «Циняв миллатир­ттал ва диннал ниттихъал макь ца куццуй кьурчIиссар. Жува личIи-личIиссару, амма жунма аьтIурча аьтIунсса букканнав так жулва оьрчIал талихIраясса ххаришиврул».
«Инсан» фондрал директорнал бувсуна ятинсса, муша­къатсса оьрчIах фондрал мудангу дакIцIуцIаврийсса къулагъас дайшиву ва байрандалул гьантрайгу миннал дакIру тирх учинсса давуртту дуваву аьдатравун дагьну душиву. Ахирданий Муфтиятрал ва «Инсан» фондрал вакилтурал ссайгъатру бавчIуна оьрчIайх. ОьрчIру ххари бавугу чирилунссархха!