«ЯрмукIартту буллалаврийну дукиялул багьри ялавай багьантIиссар»

«ЯрмукIартту буллалаврийну дукиялул багьри ялавай багьантIиссар»

Лавгсса бигьалагай гьантрай Мах1ачкъалалив хьунни республикалул шяраваллил хозяйствалул ярмукIа.

ЯрмукIа ххал бан бувкIун бия шяраваллил хозяйствалул ва дукиялул министр Баттал Батталов, промышленностьрал ва машлул министр Низам Халилов, МахIачкъала шагьрулул мэр Салман Дадаев.

ЯрмукIалий гьуртту хьунни 180 фермер, Дагъусттаннал сайки циняв районнаясса сельхозкооперативрду ва шяраваллил хозяйствалул идарартту.
ЯрмукIалий дирхьуну дия дикI, накIлил продукция, ахъулсса ва ахънилсса. Къизлардал райондалул «Рис» СПК-лул Рамазан зурун хасну дачIи тонна ппиринжрал дарчIунни укра.
ЯрмукIалий лархъун дия Россельхозбанкрал Дагъусттаннал филиалданул стенд. Банкрал вакил Намик Аьбдуллаевлул бувсунни банкрал хIасул бувсса хасъсса машлул онлайн-площадкалия. Микку фермертураща бюхъан тIий бур цала продукция щала Аьрасатнавун дахлансса каталогру бишин. Му бакъассагу, сельхозпроизводительтураща бюхъан тIий бур микку цанна аьркинсса техника машан ласун.

Машлул кьюкьрайх увккун махъ, Баттал Батталовлул кIицI лавгунни Дагъусттаннал властирдаща бювхъуну бушиву март зуруй жунна ккарксса дукиялуцIун бавхIусса авара лещан бан.
Щала республикалий буллай байбивхьусса ярмаркардал кумаграйну хIакьину дукиялул багьри саргъун бан бювхъушиву.
«ХIакьинусса ярмаркалий дуссар чIярусса дикI, аьнакIив, накIлил продукция базардавунияр кьювкьусса багьлун, ми цалчинсса каруннива ласун бюхълай бухьувкун. Масалдаран, яттил ва гъаттарал дикI ласун бюхълай бур 300-370 къурушран кг., нувщив — 40 къ., калан – 60 къ.

Фермер Симардин Ибрагьимов
ларсун увкIсса дикI ярмукIа байбишиннинна
духларгун дия

Республикалул каялувчитурал жул хьхьичI бивхьунни базардавусса ва машлул сетирдавусса багьри ялавай бичинсса чаранну лякъин. Жуща бювхъунни ва тагьар саргъун дан ярмукIардайну. Му бакъассагу, жу байбивхьуру хъурунния ва ахъурдия дучIаймур гьарзану дугьлай. Цил кьаралданий най дуссар хъуру дугьаву, мунийн бувну шяраваллил хозяйствалия дучIаймунил лагругу хъунна хьуну, миннуха зузимигу чIяву хьунтIиссар», – увкунни шяраваллил хозяйствалул министрнал.

Низам Халиловлул кIицI лавгунни республика дузалну душиву агьалинан диял хьунуксса дукиялулгу, чара бакъа аьркинсса хъуслилгу.
«ЯрмукIарду буллалиссар, цалчин, дукиялул багьри ялавай бичиншиврул ва, кIилчингу, агьалинан ккаккан баншиврул дукия жула республикалий диял­сса душиву. Мукун бушиву жунма чIалай бур ва хIакьинусса ярмук1алий», – увкунни Минпромторграл бакIчинал.

Салман Дадаевлул кIицI лавгунни Дагъусттаннал аграрийтурал итадакьлакьисса продукциялул даража лавайсса бушиву.
«Жу ихтилат барду муштаритуращал ва хъус итадакьлакьиминнащал. Цинявппа рязину бур. МахIачкъала шагьрулул агьали барчаллагьрай бур шяраваллил хозяйствалул хъуслиха зузиминнайн, Дагъусттаннал кьатIувгу цIа кIулсса жулла кIанттул дукия лагьсса багьлун ласун бюхълай бушиврухлу», – увкунни хъуншагьрулул мэрнал.
Ванал барчаллагь увкунни Дагъусттаннал Минсельхозпродрал ва Минпромторграл каялувчитурахь, ярмукIа сакин бансса кабакьаврихлу.
Баян бунни шяраваллил хозяйствалул министрнахь тавакъю бувшиву укунмасса ярмукIа апрель зурул ахирданий, Зумаритавал байрандалул хьхьичI, бангу кабакьу бува тIий.
ЯрмукIалий ца кIанттая кIанттайн ласайсса ветеринарно-санитар экспертизалул лабораториялул пишакартал ххал дуллай бия накIлил ва дикIул даража.
ЯрмукIалий дукиялул багьри ххал буллай бия ДР-лул Жяматийсса Палаталул комиссиялул вакилтал.
Ва комиссиялул вакил Минажат ХIасановал кIицI лавгунни гьантрал хьхьичI ДР-лул Миллатирттал иширттал министерствалий хьусса батIаврий комиссиялийн тапшур бувну бушиву базардавусса ва машлул сетирдавусса дукиялул багьрал мониторинг дан.
ЧчатI шахьай идарарттан хIукуматрал субсидияртту итабавкьуну бунува, циванни ччатI ххира бувсса куну цIувххукун, ванил бувсунни ва суал гара батIаврийгу сукку бувшиву ва комиссиялул вакилтурайн тапшур бувну бушиву ччатIул багьрал мониторинг дан.

Читайте также: