Лавайсса даражалий пишалул магьиршиву ккаккан дурсса педагогтал барча буллалисса мажлисрай гьуртту хьунни ДР-лул Халкьуннал Мажлисрал КIулшивуртту дулаврил ва элмулул комитетрал председатель Елена Павлюченко, ДР-лул БакIчиначIасса ниттихъал ва оьрчIал ихтиярдал вакил Марина Ежова, ДР-лул кIулшивуртту дулаврил ва элмулул министр ЯхIия Бучаев, ДР-лул КIулшивуртту дулаврил зузалтрал профсоюзирттал организациялул председатель МахIаммад Амиров, Дагъусттаннал педуниверситетрал ректор Нариман Асваров.
Елена Павлюченкол, мажлис тIитIлай, барчаллагь увкунни пишалул магьиршиву ккаккан даврил бяст-ччаллаву гьуртту хъанай бивкIсса педагогтурахь.
Гьашину республикалий «Воспитатель года Дагестана» конкурс ацIния кIилчинни хъанахъисса. Ххюва гьантлий нанисса конкурсрал бяст-ччаллаву гьуртту хьуминнал ккаккан дунни педагогшиврул магьиршиву, кIибавчIунни кувннал кувннащал даврил опыт. Му бакъассагу, цала бюхъу-гьунар ккаккан бунни «Моя педагогическая находка», «Педагогическое мероприятие с детьми» тIисса номинациярттай.
ЯхIия Бучаевлул хIукму бунни конкурсрал лауреатътуран «Отличник образования РД» тIисса хIурматрал лишанну дулун. КIулшивуртту дулаврил ва элмулул министрнал хъиривчу Аида ТIалхIатовал барчаллагьрал чагъар тапшур бунни конкурсрал даву дуван чIарав бавцIусса МахIачкъала шагьрулул 59-мур оьрчIал багърал каялувчинайн.
Конкурсраву гьуртту хьуминнан Дагъусттаннал педагогтурал Ассоциациялул чулухасса хасъсса бахшишругу дуллунни Республикалул КIулшивуртту дулаврил центрданул директор Анжела Байрамбековал.
Конкурсрал хIасиллайн бувну хьхьичIунмур педагогну ккалли бунни МахIачкъала шагьрулул 9-мур оьрчIал багъраву музыкалул каялувчину зузисса Мариям Барецкая.
Призертал хьунни Избербаш шагьрулул 12-мур оьрчIал багърал тарбиячи Асият МахIмудова, Хасавюртуллал «Ласточка» тIисса оьрчIал багърал тарбиячи Альбина Шихсултанова, Дарбантуллал «Улыбка» тIисса садикрал тарбиячи Наиля Сулайманова, Каспийск шагьрулул «Дельфинчик» тIисса оьрчIал багърал учитель-логопед Асият ЯхIияева ва Меусияшиял байбихьулул школалул оьрчIал багърал тарбиячи Наида Тимирова.
Ва конкурсрай ххув хьусса тарбиячи гьуртту хьунтIиссар Ярославль шагьрулий хьунтIисса Щалагу Аьрасатнал «Воспитатель года – 2022» тIисса конкурсрай.
