Дагъусттанная инттулсса призыврай аьралуннаву къуллугъ буллан 3 азаруннийн бивсса жагьилтал гьантIишиву бувсунни республикалул аьрали комиссар Дайтбаг Мустафаевлул «ХIакьикьат» кказитрал редакциялий хьусса пресс-конференциялий.
Ванал бусласимунийн бувну, жула призывниктал къуллугъ буллан тIий бур билаятрал личIи-личIисса регионнай личIи-личIисса журалул аьралуннаву, мукунма закондалул аьрали къуллугъ ккаккан бувсса министерстварттаву ва ведомстварттаву, миннувух Росгвардиялуву ва цаймигу гужирдал структурардаву. Инттусса призыврал кампания най дикIантIиссар апрель зурул 1-нния дайдирхьуну июль зурул 15-ннийн бияннин.
Дагъусттаннал БакIчи Сергей Меликовлул тапшур бувну, хIасул бувну бур республикалул, муниципал районнал ва шагьрурдал округирттал призыврал комиссияртту. Мивун ххи бувну бур 10-ннийн бивсса жяматийсса организациярттал вакилтал. Нитти-буттахь, жяматийсса ишккаккултрахь ихтияр дур,цума ухьурчагу, призывникнал хIакъиравусса призыврал комиссиялул заседаниялий гьуртту хьун.
Агана призывникнан муниципал комиссиялул цала хIакъираву закондалуцIун къабавкьусса хIукму бувну чIаларча, мунахь ихтияр дур Дагъусттаннал БакIчи Сергей Меликовлул каялувшиндаралусса республикалул комиссиялийн ягу цува ялапар хъанахъисса кIанттурдайсса судрайн аьрза бан.
Республикалул призыврал пунктру 100%-рал дузал бувну бур аьркинсса кьай-кьуйлул ва дука-хIачIанмунил.
Аьралуннаву къуллугъ бан наниминнал лаххан бантIиссар аьрали янна, миннахьхьун булунтIиссар дуканмур ва медициналул аьркинмур дусса кьуцуртту.
Журналистътурал суаллахьхьун жавабру дуллай, военкомнал бувсунни цавагу призыврай къуллугъ бан лавгсса жагьил ва резерврайсса инсантал Украиннал аьрщарай нанисса хасъсса аьрали операциялуву гьуртту къахьунтIишиву.