Видеосурат «Мазурдил зунтту»

Дунияллийцири кинофестивальлай хьхьичIунсса кIанттурду бувгьу­сса машгьурсса режиссер Родион Исмяиловлул Дагъусттаннай документал журалул видеофильм «Мазурдил зунтту» ларсун дур.


Родион Аьрасатнал кинорежиссертурал гильдиялул членгу, Телевидениялул ва радиолул Евразиянал академиялул членгу ур. Оператор Михаил Горобчукгу мукуна Аьрасатнал Кинематографистътурал союзрал член ур. «Жу 2021-ку шинал апрель зуруй Дагъусттаннал культуралиясса ва аьдатирттаясса фильм хIадур дуллай байбивхьуру.

УрчIва зурул мутталий бивру республикалул 30 райондалийн, ласарду личIи-личIисса миллатирттал вакилтураща интервьюрду. Сайки 200 инсаннаща. Ттул пикрилий, щаллу-ккурккисса киноэнциклопедия хьунни. Ванилгу бутIа бишинтIиссар Дагъусттаннал агьалинал культура ва аьдатру ялун нанисса никиран кьадрулий ядавариву», – тIий ур цува автор ва режиссер Родион Исмяилов. Съёмкарду къуртал дуван тIий бур 2023-ку шинал март зуруй.

Ва видеофильм кьатIаллил билаятирттал мазурдийнгу таржума дувансса ният дур ваниха зузиминнан. Ва дунияллул халкьуннал дянивсса кинофестивальлайгу ккаккан дуллансса дакIний бур. ТIайлабацIу баннав! Мяйжаннугу щаллагу дунияллул гъунттуй Дагъусттаннал ляличIишиврия, мазругу, культурагу, аьдатругу ядурну, личIи-личIисса миллатирттал агьлу бавкьуну, нахIуну яхъанай бушиву илданун цал уттигу кинорал мазрай ккаккан бувансса даву дур.