Ттун 84 шинни. Ларгсса шинал, гъинттул чIумал, на ковидрал къашай хьунав, МахIачкъалаливсса Ветерантурал госпитальданий уттуишин увнав. Госпиталь къашайшалтрал бувцIуну бия, цуксса хIакинтал, ялув бавцIуну, леча-ххечалий бухьурчагу, циняв ххассал буван хъанай ба­къая. Ттул ишгу ххуйну бакъая. ХIакинтал, хъин хьунтIиссара тIий, дакI хьунмур бусларчагу, дунияллувагу дакI дурккун, зат зумув дишин ишттахIгу бакъа, дукангу къахъанай, къаххуйну ияв.

Сайки суккувагу хьун къашайсса тагьарданийн агьунав. Ва захIматсса ппурттуву Аллагьу Тааьланала ттун кумагчи гьан увхьунссия. Ттущал ца палаталуву ия Цалчинмур ЦIувкIратусса ХIусманов МахIаммад. Ва жагьил чIарав акъассания, на азарханалия сагъну шавай къагьан­ссияв. Ванал чIивисса оьрчIаха къабайсса хIурмат бувна ттуха, къусух зат зумув дихьлай, ялув авцIуну, аякьалий ия ца маччачунаха куна. Къуса канил дугьансса хIалвагу бакъасса на МахIаммадлул ва хIакинтурал хIарачатрайну, чан-чанну тIий, къулай хьунав. На шавай итаакьайхту, кIира нюжмардува Шамхал-Терменнайн ттучIан шавайгу увкIуна МахIаммад, на цукун урив ккаккан. Ва жагьилнал алвагьшиврул, узданшиврул на хIайран унна.

МахIаммад зий ивкIун ур МахIачкъалалив милицанал органнайгу, таможнялийгу. Ва таможнялул къуллугърал майор ур, цIана зий акъар. Ванал 92 шинавусса нину ковидрал къашай шайхту, вагу МахIаммадлул ччаннай дацIан дуршиврий дакI дарцIуну ура. Ятсса ттуха ла­хъан къахьунсса хIурмат був­сса, аьзизсса ниттиха цукун лавай авцIуну, аякьалий ухьунссия. На ванан цанмагу, ванал кулпатран, мукьвагу оьрчIан, душнил наслулун, ниттин цIуллушиву чIа тIий ура. ЦIувкIуллал жяматрайн барчаллагьрай ура укун­сса арснахлу.
Шамил Идачев,
Щамхал-ТермеН

Вана укунсса чагъар бувкIу­нни жул редакциялийн. Ххишала бакъа ххари хьунна ттула шяравучуная укун рязи­сса чагъар буккайхту. Ялун ххи буванна МахIаммад, буниялттунгу, дугърисса, дакI ххуй­сса, инсантуран кумаг буван чялиш уккайсса инсан ушиву. Ва шяраваллил жяматрал гьарцагу иширттавухгу хIала уххайссар. ЦIувкIуллал жяматран ххирасса жагьилли вагу, ванал хъунама уссу АьбдурахIмангу.
Инсантал ххари буллан цIуллушиву дулуннав зухьхьун, ниттихьхьун Са­гъиратлухьхьун, наслулухьхьун. МахIаммадлул бувмур чирину зана бикIаннав, АллагьначIа кьамулну лякъиннав. Барчаллагьрикьай инсаншиврун, дугъришиврун.