Итникьини Лакрал театрдануву хьунни Аьрасатнал магьирлугърал бусравсса ишккакку, Дагъусттан Республикалул паччахIлугърал кIийла лауреат Валерий Эфендиев дунияллийн увккун 80 шин шаврил юбилейран хас бувсса аьпалул мажлис.

Гьунар бусса режиссер, актер, педагог дакIнийн утан бувкIун бия Дагъусттаннал магьирлугърал ишккаккулт, даврил уртакьтал, дус-ихтивартал ва мачча-гъанми.
Мероприятие дайдирхьуна, Валерий Эфендиевлул оьрмулул 60 шинал юбилейран хас дурну, Да­гъусттаннал телевидениялул журналист Миясат Раджабовал хIадур дурну диркIсса «Режиссернал оьр­мулувасса ца гьантта» тIисса документал фильм ххал даврийну.

Муния махъ Аьрасатнал культуралул лайкь хьусса зузала Качар ХIусайнаевал лавхъуна Валерий Эфендиев дакIнийн утлати­сса махъ.
— Гьунар ххисса артистгу, режиссергу, драматурггу, театрал коллективрал каялувчигу ва сакиншинначигу хIисаврай, Валерий Эфендиевлул ликъаххайсса аьш кьариртссар республикалул театрал магьирлугърал тарихраву. Абадлий личIантIиссар цува кIулну ивкIминнал дакIурдивугу — увкуна ванил.

— ЧIивисса миллатрал дянив ляхъарчагу, Валерий Эфендиев ивкIссар Аьрасатнал даражалул режиссер. Мунал цала артисталгу тарбия буллай ивкIссар классикалул драматургиялул сипатирттай.
Сайки ацIвахъул пьесарду чивчуссар Валерий Эфендиевлул. Миннувагу яла хъунма­сса тIайлабацIу бумурну хьуссар «Особняк». СССР- данул прессалул итталунгу багьну, билаятрал чIявусса театрдал бивхьуссар му. Критиктурал лавайсса кьиматрангу лайкь хьуссар, — увкуна Лакрал театрданул хъунама режи­ссер Аслан МахIаммадовлул.

Муния махъ Лакрал театрданул артистурал ккаккан бувуна Валерий Эфендиевлул пьесалийн режиссер Ислам Казиевлул бивхьусса «Хъин хъамаличу» тIисса спектакль.
АрхIал зузиминнах вичIи диширча, Валерий Эфендиевлул пикригу, буруккингу бикIайва тIар жула зунттал аьдатру хъамаритлатаву, ниттил маз ссуссукьу хъана­хъаву. Гьамин, хIакьинусса кьинигу хъинну агьамсса тема аьч дуллай дур ва спектакльдануву.

Шагьрулий университетрал доцент МахIаммадлул квартиралийн сагъсса кугу хъаралух бувгьуну, аьйкьуну укIлай ур шярава цала уссил арсначIан хъамалу увкIсса цIанихсса хIухчу Ашрапов, СССР-данул Верховный Советрал депутат. Къатлул заллухъруннан хъанахъимур бувчIлай бакъар. Ашрапов тIурча, шяраваллил зумуну къуццу тIий ур. ЦанначIан ца къабухлай, кувннан кувннал цIардурагу къакIулну бивкIсса чIаххул бавтIун, кувнначIан кув гъан буллай ур. Мукун чIаххувраннийн увкIун бакIрайн агьлай ур ганайн цала хIакьсса уссил арс. Валерий Эфендиевлул душнил Иреннул барчаллагь увкуна ппу дакIнийн утан бувкIминнахь.