Апрельданул 19-нний ДР-лул Халкьуннал Мажлисрал председательнал хъиривчу Камил Давдиев хьунаавкьунни Украинная бувкIсса кулпатращал.
Дяъвилул хасъсса операция байбишин хьхьичI Романовхъал кулпат мяйра шинавусса душнищал бигьалаглай бивкIун бур Туркнаву. Украиннал аьрщарай дяъвилул ишру щиривкIусса ппурттуву вайннал кулпатрал хIукму бувну бур Киеврайн зана къабикIан.
Дмитрийл бусаврийн бувну, Дагъусттаннайн ва хьхьичIавагу увкIун ивкIун ур. Шикку караматсса тIабиаьтгу, дакI-аьмал хъинсса, хъамал ххирасса инсанталгу бушиву дакIний ливчIунни тIий ур. ЦIана вайннал кулпат ялапар хъанай бур МахIачкъалаливсса цала маччалтрачIа.
Дмитрий ур экономист, кIулну бур ингилис мазгу, ванал кулпат Юлия парикмахер бур. Юлия, Дагъусттаннайн бучIайхту, давурттал дузал байсса Центрданул сияхIрай бавцIуну бур. Вай ялапар хъанахъисса маччаминначIагу къумашиву дур, мунияту чIумуйну ялапар хьунсса къатта-къушлил масъала дузал баврицIун ка-кумаг баву ччай бур вайннан.
Камил Давдиевлул кIицI лавгунни Дагъусттаннал агьали кумаграх мюхтажсса, кьини дурксса инсантурал чIарав бацIан мудангу хIадурсса бушиву.
– Жу хIарачат банну, жущава шайсса кумаг бувну, зул кулпатран давугу, ялапар хьунсса къатта-къушлил масъалагу щаллу бан. Республикалий цIанакул буссар лихъачалран ка-кумагру буллансса чаранну ххал бигьлай. КIулну бикIияра, жу мудангу зул чIарав буссару, – увкунни Камил Давдиевлул.
Цала кулпатрах дурсса аякьа асар хьусса Дмитрий Романовлул вице-спикернахь дакIнийхтуну барчаллагь увкунни.
