Вай гьантрай МахIачкъалалив, Тарихрал музейраву, цалчин ккаккан дунни Камал ГъалбацIов авторсса наркотикир­ттайн къаршисса документал фильм.

Кинорал презентациялийн оьвкуну бия властьрал органнал вакилтурайн, кIулшивуртту дулаврил идарарттал зузалтрайн, журналистътурайн, студентътурайн ва дуклаки оьрчIайн.
Кино ххал дуллай байбишиннин, видеоконференциялул связьрай, Камал ГъалбацIовлухь барчаллагь увкунни АьФ-лул Думалул депутат Султан ХIамзаевлул.
– Камал ГъалбацIовлул дурсса даврин багьа бакъассар. Жула цинявннал буржри ялун нанисса никиран наркотикирттая цуксса зарал буссарив бувчIин баву ва ми цIуллусса оьрму бутаврихун бичаву. ХIакьинусса кьини наркотикру ккаллину бур 21-мур аьс­рулул цIуцIавуну. Дагъусттаннал бикIу, Аьрасатнал бикIу, жагьилтал наркотикирттая арх буцан бавур ва мюхчан бавур жула агьаммур мурадгу, – увкунни Султан ХIамзаевлул.

Ванал мукунма бувсунни шанна нюжмардул хьхьичI, ихтияр дуруччай органнал зузалтрал хIарачатрайн бувну, бакъа-къатIа бувшиву Аьрасатнаву интернетрайхчIин наркотикру ппив буллалисса яла хъунмур сайт.
Кинораву ккаккан буллай ва буслай бия наркотикру ишла буллай бивкIминнал бакIрачIан бувкIмур. Мукунма бувчIин буллай бия ихтияр дуруччай органнал ва Наркодиспансерданул зузалтрал наркотикру ппив буллай бивкIми цукунсса танмихIрайн буцлай буссарив.

Кинорал хIакъиравусса пикрирду бувсунни ДР-лул МВД-лул Наркотикру ппив баврил ялув бацIаву дуллалисса управлениялул отделданул хъунмур Надежда Сайпуттиновал. Ванил кIицI лавгунни Дагъусттаннай жагьилтал наркотикирттацIун бавхIусса балаллуя буруччаву мурадрай­сса пропагандалул даву хьхьарану дуллай бушиву. МуницIун бавхIуну маслихIат бунни наркотикирттайн къаршисса документал кино республикалул вещаниялул цинярдагу каналлай ккаккан дуван.
– ХIакьину Республикалул Наркологиялул диспансерданул сияхIрай бур наркотикру ишла буллалисса 14-18 шинавун бияннинсса оьрмулул оьрчIру. Агана 3-4 шинал хьхьичI жува наркотикру ишла баврин ххуллу кьукьлай бивкIхьурчан, хIакьину интернетрайхчIин наркотикру ппив буллалисса цамургу бала ялун бивну бур, – увкунни Сайпуттиновал.
Наркотикирттайн къарши­сса документал киноравусса цаламур гьурттушиндарая ва жагьилтал наркотикирттая мюхчан баву мурадрай дурсса давурттая бувсунни МВД-лул УКОН-далул отделданул хъунама Оьмархаям Оьма­ровлул.

Сайки гьарца кьини бириллай бур наркотикру ябуллалисса ва ми ппив буллалисса жагьилсса оьрмулул инсантал. Умуд бур цинявннан бувчIинссар т1и­сса наркотикирттацIун бавхIусса иширттавух хIала бувхсса инсантуран 15-20 шинайсса, хIатта оьрмулухунссагума, танмихIру кьукьайшиву. Яла-яла мюхчанну бикIияра наркодилертурайн бакIрайн къабагьан, – увкунни Оьмаровлул.

Ихтилат бунни кинорал автор Камал ГъалбацIовлулгу.
– ХIакьину шиккун бавтIцири яла цIакьми ва низам думири учин бюхъанссар. Ца 10-15 шинал хьхьичI жува махIаттал хьун­сса цичIав къабикIайва къалиян къаучайсса ва хIан къахIачIайсса инсаннал низамрай. ЦIана тIурча, мукунсса инсантал эбратран ккалли буллай буру. ХIайп, Ккавкказнаву сийлий диркIсса инсаннал аьдат-эбадат духлаглай дур. Агана жува маччанал, дустурал, одноклассниктурал дянив профилактикалул давуртту дулларчан, бю­хъайссар жущавагу цими ухьурчангу инсан балаллуща ххассал ан, – увкунни ванал.
Гьуртту хьуминнал бувсунни наркотикирттая жагьилтал буруччаву мурадрайсса чаранная. Экспертътурал жавабру дуллунни студентътурал суаллахьхьун.
Ва документал кинорал сиптачигу, ванин харж бивхьумагу ия цува Камал Гъалбац1ов.
Музейраву кинорал презентация щаллу дурну дия ДР-лул КIулшивуртту дулаврил министерст­валул.