Виричунан хас дурсса шеърирдал конкурс

Апрель зурул 1-нний ЦIуссалакрал райондалий ЦIусса­чIурттащиял 1-мур школалий хьунни Аьрасатнал Виричу НурмахIаммад ХIажимахIаммадовлун хас дурсса Республикалул шеърирдал конкурсрал ятIап.

Конкурсрал агьаммур мурадну хъанай бур ялун нанисса ник патриот зумуну тарбия даву ва вирттаврал чувшивуртту жагьилсса никиран эбратну дишаву. Конкурсрал ятIапрай гьуртту хьунни, Аьрасатнал Виричу НурмахIаммад ХIажимахIаммадовлун хас бувсса шеърирду чивчусса, ЦIуссалакрал райондалул школарттаясса 10 дуклаки оьрчI. Шеърирдан кьимат бишлай, жюрилул хIисавравун лавсунни мяъна-мурадрал куртIшиву, шеъри багьан бувну чичаву ва мазрал пасихIшиву.
5-8-ми классирттал дянив 1-мур кIану бувгьунни ЦIу­ссачIурттащиял 2-мур школалул дуклаки душ Чигие­ва Раянал, 2-мур кIану – ТIюхчардал ООШ-лул дуклаки душ СайгидахIмадова Руфайдал ва 3-мур кIану буллунни ТIюхчардал СОШ-рал дуклаки душ Шяпиева Марияннун ва Маммаева Жамилан.
9-11-ми классирттал дянив 1-мур кIану бувгьунни Барчхойотарскаллал СОШ-рал дуклаки оьрчI Давлетгереев Залимханнул, 2-мур кIану – Гьамиящиял 1-мур СОШ-рал дуклаки душ Аьвдулмажидова Таснимал. ХьхьичIунсса кIанттурду бувгьусса ва цинявппагу гьуртту хьусса оьрчIру барча буллай, чIа тIий буру Республикалул конкурсрал финалдануву гьуртту хьунсса тIайлабацIуртту.