Март зурул 27-нний кIицI лагай Театрданул кьини. Ва кьинилун хасну март зурул 28-нний дуван хIукму бувну буссия Ккуллал райондалул шяраваллавусса Культуралул къатрачIасса театрдал кружокирттал дянивсса конкурс. Амма, райондалий му кьини язисса бивкIу хьуну бушаврийн бувну, конкурс махъун дуртуна.

[dropcap]В[/dropcap]ана утти, апрель зурул 11-нний, хьунни му конкурс. Конкурсрал сиптачиталну бия Хъусращиял шяраваллил халкьуннал театрданул режиссер Сулайманов Марсель ва Культуралул управлениялул каялувчи Ибрагьимова Марина.

Конкурсравух гьуртту хъанай бия Вихьуллал, ЧIяйннал-Хъюйннал цачIусса, Ккуллал,1-мур ЦIувкIуллал, Хъювхъиял, СунбатIуллал коллективру. Ккаккан буллалисса пьесардал тема дия дяъвилул иширттал. Хъинну хIарачатрай роллу дугьлай бия цинявппагу гьурттучитал. КIицI дуван ччива цаппара гьурттучитурал цIарду: Вихьуллал ХIасан-ХIусайнова Рукьижат, Оьмариева Камилат, ЧIяйннал Аьбдуллаев Арсен, СунбатIуллал Каптарова ПатIимат.

[dropcap]К[/dropcap]онкурсрал ахирданий жюрилул дуруна укунсса жям: 1-мур кIану буллуна Вихьуллахьхьун, кIилчинмур — ЧIяйнна-Хъюй­ннахьхьун, шамилчинмур – Сун­батIуллахьхьун.
Буллуна цанма лавхьхьусса дип­ломругу, бахшишругу.