Мартрал 31-нний Дагъусттаннал БакIчи Сергей Меликовлул ДР-лул Халкьуннал Мажлисрай бувсунни 2021-ку шинал Дагъусттаннал ХIукуматрал дурсса давурттал хIасиллал хIакъираву.
«ХIурмат бусса ДР-лул Халкьуннал Мажлисрал депутатътал ва оьвкуну бувкIми!
ДР-лул Конституциялул 78-мур статьялийн бувну буслай ура 2021-ку шинал ДР-лул ХIукуматрал дурсса давурттал хIасиллал хIакъираву.
Махъсса шиннардий Украиннал лагмасса дунияллул халкьуннал дянивсса дяъвилул ва политикалул тагьарданул анализрал гьанулий, Украиннал ва Донецкаллал ва Луганскаллал Халкьуннал республикарттал 8 шинал мутталийсса дандибацIаву цалийн дуцинсса дипломатиялул ххуллийсса бюхъурду къуртал хьуну махъ, ва жула билаятрал национал мюхчаншиву щаллу дуллай, Аьрасатнал Федерациялул Президентнал бувунни, захIматсса бухьурчагу, тIайласса хIукму. Аьрасатнан ливчIун бакъая цамур ххуллу. Мунияту Аьрасатнал чIявуми агьалинал кабакьу бунни АьФ-лул Верховный КомандующийнацIун ва хасъсса дяъвилул операциялуву гьуртту хъанахъисса АьФ-лул Ярагъбу гужирдацIун.
Жува пахрулий кIицI буллай буру, спецоперациялул лагрулий Аьрасатнал цалчинма Виричу хьушиву жула ватанлув НурмахIаммад ХIажимахIаммадов.
Жу дакIнийхтуну хажалатрай буру талатавриву ливтIуминнал. Ттулагу, республикалул циняв каялувчитурал чулухатугу, Халкьуннал Мажлисрал ва ПаччахIлугърал Думалул депутатътурал чулухатугу дакIнийхтуну жижара буллай ура ливтIуминнал мачча-гъанминнахь».
2021-ку шинал социал тагьарданул хIасиллая буслай, Сергей Меликовлул кIицI бунни республикалул экономикалул агьамми ккаккияртту, хьхьичIмур шиналминнух бурувгун, хъин чулиннайсса диркIшиву. Хъус дуккан даврил ва хIаллихшинну даврил индекс лахъ хьуну бур 4,6 процентрал. Бюджетравун дучIан дурну дур налогирттал сайки 10 млрд къуруширттал, ягу 119 процент. Промышленностьрал дуккан даймур гьарза хьуну дур 5,2 процентрал, шяраваллил хозяйствалул бакIлахъия – 0,5 процентрал, строительствалулсса – 2 процентрал, розницалийсса маша баву – 1 процентрал, багьлухсса хIаллихшиннал лагру – 16,6 процентрал, дянивсса харжру ххи хьуну бур 6,7 процентрал ва цIана ми бур сайки 32 азарда къуруш.
«Дагъусттаннай хIадур дурну дур 2030-ку шинайннинсса Социал-экономикалул лябуккулул стратегия. Утти жува зун аьркинссар му документрайн чул бивщуну.
2021-ку шинал республика гьуртту хьуссар 12 национал проект бартдигьавривух. Миннун аьмну личIи дуван ккаккан бувну бур 24 млрд къуруширттал.
2021-ку шинал промышленностьрал хъус дуккан даврил ккаккияртту хъин чулийсса хьуну дур. Мунин кумагну хьуссар 7,3 млрд къуруширттансса обороналул сурсатру, электроэнергия дуккан даву, 2020-ку шиналминнух бурувгун, 140 процентрал гьарза шаву, мукунна цIусса сурсатру дуккан дуллалаву (усру дайсса фабрикартту МахIачкъалалив ва Буйнакскалий). Гьарза хьуну дур мукунна электроэнергия дуккан даву.
ПаччахIлугърал чулухасса кумагну хьуссар мукунма индустриал паркру баву. ХIакьинусса кьини республикалий ми бур 6.
Ккаккиялунсса давуртту дурну дур газрал аралувугу. Му ара лядуккан даврил ца агьамсса ххуллу-ххану хъанахъиссар газрал объектру баву, миннул реконструкция даву. Жу къуртал дуварду газораспределитель сетирдал инвентаризация ва кадастрданул учетрайн ласарду 1,5 азарда километра заллухъру бакъасса сетирдал.
2021-ку шинал хIасиллайн бувну, миккугу дуллай бур тамансса давуртту. Гьарза дурну дур дугьайсса хъуру, мунийну дукIу къалмул ва ппиринжрал бакIлахъия гьарзану ларсун дур. Хъинсса лябукку хьуну бур багъру бавривугу, 2021-ку шинал республикалий дургьуну дур 1100 гектар багъирдал, ларсун дур 195 азарда тонна ахъулссаннул.
ХьхьичIуннайшивуртту хьуну дур ризкьи ябавривугу. Гьар шинах Дагъусттанная Аьрасатнал регионнайн ласайссар сайки 15 азарда тонна дикIул. 2021-ку шинал къуртал дурну дур цаппара инвестициярттал проектру. Зузи бувну бур ятту ва гъаттара биххайсса, ккурккимайртту дайсса цаппара цехру.
Тамансса давуртту дурну дур мукунна мелиорациялул аралувугу. Лябукку хьуну бур МахIачкъалаллал аэропортрал иширттавугу.
