Апрель зурул 12-нний Аьрасатнаву Космонавтикалул кьини кIицI лагай. Гьамин, ва кьини, 61 шинал хьхьичI, Юрий Гагарин космосравун левхссар.

Аьлам мютIи бувсса вирттаврая оьрчIахь бусласисса мероприятие дунни СунбатIуллал шяравугу. Семинар хIисаврайсса ва даву хIадур дурну дия шяраваллил библиотекалул хъунмур Света МахIаммадрамазановал. ЛичIинува пахрулий буслай бия СССР-данул Виричу, тIивтIусса космосравун арийла увккун аьмну 34 ссят дурсса Муса Маннаровлуя. Дуклаки оьрчIахь мукунма бувсуна космонавтикалул хьхьичIуннайшивурттая, машгьурсса космонавтътурая, космосрал элмулуву хьхьичIунминная, цIушиннарду дурминная.
Космонавтътурал гьунардая дуклаки оьрчIахь бусан оьвкуну бия ветерантурайнгу.

– Дуклаки оьрчIахь буслан аьркинссару космосравун ххуллу лавсъсса вирттаврая, Аьрасатнал билаят цалчин космосравун инсан гьан увсса бюхттулсса билаят бушиврия. Ва хIакьинусса мероприятиялийгума жунма чIалай бур оьрчIру бусласимуних цуксса гъирарай вичIи дирхьуну буссарив, – увкунни Щамхал Хизриевлул.
ОьрчIал дурккуна космосран хас дурсса назмурду. Дия викторина, хъамакъабитулун рирщуна суратру.