Апрельданул 20-нний Дагъусттаннал БакIчи Сергей Меликовлул ва АьФ-лул обороналул министрнал хъиривчу Тимур Ивановлул дунни региондалий «Демография» тIисса национал проект ва «Дуккаву лядуккан даву» тIисса АьФ-лул паччахIлугърал программалул лагрулий социал объектру баврил масъалартту.
Региондалул каялувчинал бувсунни цачIу дузал буллалисса масъаларттал агьамшиврия ва барчаллагь кунни федерал ведомствалул вакилтурахь, Дагъусттаннах къулагъас даврихлу ва социал инфраструктуралул объектру баврихлу.
«Обороналул министерствалул ва захIматсса чIумал бакIрайн лавсунни республикалий буван оьрчIал садикру, яслирду ва школартту. Мяйжанссар, давуртту чансса лахъи ларгунни, дия мунинсса сававрттугу. Утти ми хъирив лаян данссар.Ттул пикрилий, ми давуртту къуртал дуванссар гьашинура», – кунни Сергей Меликовлул.
Тимур Ивановлул тIимунийну, АьФ-лул Обороналул министерствалун хIукму хьуну бур цIусса аьралуннал госпиталь буван гарнизондалул аьрщарай.
БатIаврий гьуртту хьуминнал ххал диргьунни социал объектру бавриву ялун личлачисса захIматшивуртту ва лявкъунни ми дукьан дувансса ххуллурду.
Гара Тимур Иванов увкIунни Дагъусттаннайсса Каспийскаллал флотилия бусса кIанайн, причалданул фронт цукун дузал хьуну бурив ккаккан. ЦIанасса ппурттуву Каспийскалий буллай бур цIусса гидротехникалул сооруженияртту.