Дагъусттаннал хIухчалтраясса кино ласунтIий бур

Апрельданул 27-нний «Дагъусттан» РИА-лий хьунни «Творческое объединение «Свое Слово» кинокомпаниялул вакилтурал пресс-конференция. Ванинсса хъин сававнугу хьуна ва шинал май зуруй, АьФ-лул Культуралул министерствалул чIаравбацIаврийну, Дагъусттаннай хIухчалтраясса документал кино ласлан хIадур хъанахъаву.

ХIухчалтрал бигьа дакъа­сса давриясса, хаснурив, ятту къутанная интту зунттавун ва ссу­ттил махъунмай арив нанисса мутта ккаккан буллантIисса киносуратран цIа дикIантIиссар «Полигон» тIисса.
Ва даврицIун бавхIусса затир­ттая журналистътурахь бувсуна режиссер Аьбдулла Бечедовлул, продюсер Анна Смирновал, оператор Михаил Горобчуклул, технический директор Евгений Смирновлул.

– Жулла региондалун хасъсса ва тематикалиясса кино ласун­сса пикри ва цурда проект ванияр шаннахъул шиннардил хьхьичIра хIадурнура дуссия. КIийлла кьамул къадурну, шамилчин кьамул дурунни ва. Жулла республикалул шяраваллил хозяйствалуву ятту баврил бугьлагьиссар ца яла хьхьичIунсса кIану, ятту бавривугу ария зунттавун ва зунттава арив ятту куч баву хъанахъиссар агьамсса кIануну, – бувсуна Аьбдулла Бечедовлул.

Каспий хьхьиричIату байбивхьуну, лахъсса зунттавун бияннин хIухчалтрал ва яттил 20-22 гьантлий битайсса ххуллу ккаккан бувантIиссар кинораву.
Анна Смирновал кIицI лавгунни ва проект цурда хъинну хIазсса, хъинну аьркинсса проект душиву, мунищала архIал щаллу дувангу хъинну захIматсса душиву.
– ХIухчалтращал, яттищал архIал жугу бачин тIий буру зун­ттавух бахьтта, жущалла аьркин­сса кьай-кьуйгу, техникагу ларсун. РахIатсса ичIалугу, давугу кьадиртун, укунсса шартIирдаву зун ччима рязи къахьунссар. Уку-укунсса кIанттурдугу хIисавравун лавсун сакин дурсса команда дуссар «Творческое объединение «Свое Слово» кинокомпаниялул.

Михаил Горобчуклул цукссагу хIал хьуну бур документалистикалуву зий. Уттинин гьуртту хьуну ур вара журалул давриву – Чукоткалий, ва хIаласса съемочная группалул чукчахъащал дякъивух шанма барз бувну бур, оленеводтуралмур давриясса кино ласлай. Дагъусттанная тIурча, Михаил гьурттуну ивкIссар жулла респуб­ликалиясса «Гора языков» тIисса проектравух.
– КIа проектраву жу ккаккан буллай буссияв чIюлусса Дагъусттан – миллатирттал лаххи-ликкулувусса, ранг-рангсса. ЦIанарив ккаккан буван багьлай бур захIматралмур чул. Ва ххуллухмур давриву ишла дувантIиссар квадрокоптердугу, – бувсуна Михаил Горобчуклул.
Кинорал техникалулмур чулухаллия ихтилат буллай, Евгений Смирновлулгу кIицI лавгуна ва щаллу дуван захIмат хьунтIисса проект душиву, дунугу, цив циняр захIматшивурттайн хIадурну бушиву.

ХIухчалтраясса кинораву ккаккан дувантIиссар шинал шанна чIун: инт, гъи ва ссут. Кинорал премьера, календарьно-постановочный пландалийн бувну, хьунтIиссар ялунчIил, 2023-ку шинал, март-май зурдардий. Документаль фильм цурда дикIантIиссар 44 минутIрайсса.