Гьашину жул ЧIяйннал школалун хъанай дур 110 шин. Ттул ихтилат, нава дуклай бивк1сса школалияр, ацIрахъул шиннардий ттухьра дарсру дихьлай бивкIсса учительтураяр. Ттун, цIанакул кунма, дакIний бур, нава бугьара хьуну бунугу, ттущала дуклай бивкIсса оьрчIру-душругу, учительталгу.
1948-ку шинал на ниттищал лавгра школалийн. Ттущал бия ттула оьрмулувусса 20-25 оьрчI-душ. Жу бувцунав шяравусса, цIанакул СПК бусса, къатравун. ЖучIан бувкIуна ца лахъ-лахъсса оьрус учительница, ганил тIимургу жун ча бувчIинссия, цавагу оьрус махъ къакIулсса. Жуя ганингу ци бувчIинссия. Хъиривмур кьини я классрансса къатта, я оьрус учительница бакъая. Школалийн бувцуру. Дарсру дихьлан бувкIуна жула ЧIятусса Кьадиева ПатIимат. Шанна шинай ганил дирхьуна жухь дарсру. Ттул цалчинсса учительница хьуна ПатIимат Кьадиева. Ванил лахьхьин бувна ттун чичин-буккин, къакIулмур кIул бан. Ниттил куннасса къулагъас дикIайва жух цинявннах. Ттун цIанакулгу дакIний бур, тетрадьрай цавагу мукьва бивхьуну къакIулли – циняв ххюварду. Ттул хатIгу ххуйсса бия.
На шанма класс къуртал бувссия. Мукьилчинмур классравун жучIан увкIуна Сулайман Мяммакьурбанович. Гьарца кьини дарсирдайн мандолина бикIайва. Га ниттила артистну увсса ия, гьарца переменалий рурцуну, балайтIи бувну, къавтIи бувну икIайссия. Га шингу оьну тяхъану ларгуна. Ххюлчинмур классраву жучIа учительтал гьарза хьуна, личIи-личIисса дарсру дихьлан. Оьрус мазрал дарс дихьлан бувкIуна МахIмудова Патка, жул каялувчигу га бия. Математика дишайва ХIажиева ПатIиматлул, аман, дурчIин дайва дарс ца ххуйну.
Ттулагу яла ххирамур дарс математика хьуна. Биология Амучиева Розал дишайва. Ряххилчинмур классраву оьрус маз дишайва ХIусайн МахIаммадовичлул, математика Аьбид МахIаммадовичлул. ХIасил, лавайми классирттаву дарсругу гьарза хьуна, учительталгу гьарза хьуна. На бивра 8-10-ми классирттавун. Жул шяраву интернат бия. Щархъаясса оьрчIру, душру гьарза хьуна. Жу уссур-ссу кунма бикIайссияв. Жула райондалия бакъассагу, лагмасса районнаягу букIлан бивкIуна чIявусса оьрчIру-душру. БукIлай бия Ахъушиял, Дахадаевуллал, Агъуллал, РутIуллал районная. Жухь дарсру дихьлай бия ххуйну дурккусса, захIмат ххирасса, ссавур дусса учительтурал коллектив, дарс лахьлан гъирагу бикIайва.
Жул директорну уссия Абачара ХIусайнаев.
Барчаллагьрай зумух ласун ччай бура танийсса цинявппагу учительтурал цIарду: Ваччатусса Ума МахIаммадова (оьрус маз), аьсатIин миллатраясса Пазрит Малиевич (география), ялагу ца аьсатIин Исмяил Исмяилович (физика), Ккурклиясса Патааьли Аьбдуллаевич (физкультура), Кьукниясса Муса Оьмарович, СунбатIлиясса Ися Мусаевич, ЧIятусса Мудун МахIмудович, Ваччатусса АхIмади СултаахIмадович, ХIажи Адамов, Къяниясса Камил Оьмаров.
Вайннал бувгьусса гьаннарай ххуй-ххуйсса ахъулсса ххярхссар. Жул чIунну захIматсса дия, захIматсса дунугу, тяхъасса дия.
Я Аллагь, аьпалухьхьун лавгсса цинявппагу учительтурал бунагьирттал аьпа баннав, цал захIмат АллагьначIа хъинну лякъиннав!
Б. Маммедова,
захIматрал ветеран
