Апрельданул 8-нний Москавлив Аьрасатнал ХIукуматрал Председательнал хъиривчу Татьяна Голиковащалсса хьунабакьаврий кувннал кувннан кумаг баврил щалагу Аьрасатнал #МЫВМЕСТЕ акциялул волонтертурал щалагу Аьрасатнал #ДоброВСело проектрал цIусса сезондалул дайдихьу дунни. Ва проект жулла республикалий зузиссаксса хIаллайсса уттининсса хIасиллугу ххуйсса хьуну дур.
Апрельдануя октябрьданийн бияннин #ДоброВСело проектрал волонтертал медициналул зузалтращал архIал занантIиссар шяраваллавун, шиккусса ФАП-рдай медициналул зузалтран консультация, диагностика давриву, мукунма ФАП-рдал лагма-ялттусса кIанттурдал авур дучIан давриву кумаг буллан. Проект зузисса 3 шинал дянив 9 азарунная ливчусса инсантал хьуну бур ванил гьурттучитал.
Ва проектрал аьркиншиврия буслай, ДР-лул цIуллу-сагъшиву дуруччаврил министр Татьяна Беляевал увкуна:
– Шяраваллил цIуллу-сагъшиву дуруччавриву жулва студентътурал буллалисса захIматрал агьамшиву дуссар практикалул даврил чулуха кунна, тарбиялулмур даврил чулухагу. Ца чулуха ва хъанахъиссар шяраваллил хIакинтурансса ва фельдшертурансса кумаг, цилгу медициналул зузалтрал ларсун нанисса гьиву чансса-дунугу куклу дуллалисса. Вамур чулухагу жагьилтуран студентну бунава чIалачIиссар практикалулмур чул ва шиккува вайннал пикри буллалиссар шяраваллил кIанттайн бизаврил ялувгу.
Дагъусттаннал волонтертуралмур даврия бувсуна региондалийсса #МЫВМЕСТЕ клубрал каялувчи Карина Бамматмурзаевал.
