Апрель зурул 13-нний Дагъусттаннал БакIчинал ва ХIукуматрал Администрациялул каялувчи Алексей ХIасановлул каялувшиврийну ххал бивгьунни март зурул ахирданий ва апрельданул дайдихьулий ЦУР- данул ( Центр управления регионом) ялун личин бувсса агьамсса масъалартту.

ХьхьичI ххуттай къулагъас дуван аьркинми масъаларттавух бия багьри гьаз буваврицIун бавхIуми. Мукунма щинал, ттукIрал ва газрал дузалшиндарацIун бавхIусса, социал выплатарттал тема, ххуллурду бакьин баву, ччюрк, ххиличIрурду духлахаврилмур масъала ва мукунма шагьрурдай­сса шярал ккаччал масъала.
Алексей ХIасановлул кIицI лавгунни, вай циняв масъалартту сантирай ва лябуккулий бартбигьланшиврул, властьрал ва агьалинал дахIаву дикIан аьркиншиву.

Республикалул ЦУР-данул хъунама МахIаммадсултан Аьб­дуралимовлул бувсунни Ма­хIачкъалалия, Каспийскалия, Дарбантлия, Хасавюртлия бувкIсса 620 аьрзлуву къулагъас дуван багьлай бушиву Каспийскалий чапалсса щин сававну 71 инсан азарханалийн агьсса иширахгу. Каспийскаллал мэр Борис Гонцовлул бувсунни цаягу къашайшала захIматну къашавай къавхьушиву ва циняв шаппай итабавкьушиву, ва иширал тахсикар лявкъушиву ва муная кьянкьасса жаваб тIалав дувантIишиву. Аьбдуралимовлул ялагу чIурчIав дунни агьали дуки-хIачIиялул багьри гьаз шаврияту аьрзирдай бушиврий.

Шяраваллил хозяйствалул министр Баттал Батталовлул баян бунни, гьарца кьини тIиссакссагу, багьрал ялув бавцIуну бушиву, накI, ккунукру, къур, калан, чимус утти цахъи кьювкьуну бушиву. Бувсунни Дагъусттаннал хъунаманал тапшур бувшиву чIун-чIумуй базардавунияр ялавай­сса багьрай аьркинмур дахлахисса ярмукIарду дуваван, мукун дуллантIишивугу.
Дарурттал багьри гьаз шаврил хIакъираву тIурча, цIуллушиву дуруччаврил министр Татьяна Беляевал бувсунни щитовидкалул къашавайминнансса даруртту букIлан бивкIшиву, диабетиктурансса, астматиктурансса дарурттугу чан хьун къабитантIишиву, багьригу гьаз хьун къабитансса чаранну ккаклай бушиву.

Ххал бивгьунни мукунма туризмалуцIун бавхIусса суаллугу. Минтуризмалул каялувчи Эмин Мердановлул бувсунни туристътал ила бивчусса кIанттурдай санитар тIалавшиннарду дузал дуллай бушиву, кIани-кIанттурдай субботникру дуллай байбивхьушиву, мурхьру бугьлай бушиву.
ТIабиаьтрал ресурсирттал ва экологиялул министр Ибрагьим Ибрагьимовлул бувсунни, 16 райондалул агьлу гьурттуну, ратIру, нехру марцI дувансса субботникру дувантIишиву Рамазан барз къуртал хьуну махъ. Бувсунни нехру, ратIру хасну марцI дувайсса мукьва машина ласунтIишиву.
БатIаврий мукунма кIицI лавгунни газ буцин бувасса кIанттурдаятусса агьалинал гьаз бувсса масъаларттугу.