ХьхьичI ххуттайсса проектру

Апрельданул 18-нний ДР-лул БакIчи Сергей Меликов гьуртту хьунни АьФ-лул Х1укуматрал Председательнал хъиривчу Александр Новаклул каялувшиврийсса батIаврий. Муний ххал дигьлай бия Ухссавнил Ккавкказуллал федерал округрайсса субъектирдаву лябуккулул (прорывные) проектру бартдигьаврил масъала. Регионнал бакIчитурал вице-премьернахь бувсунни цIу дуккан дурсса проектирдал хIакъираву.

ЦIана жулла экономикалул кьянкьашиврул хIал ххал бигьлагьиссар. Оьчулийсса асардайн къарши букканшиврул лагма лавгун бур иширавух гьур­тту хъанахъисса циняв – АьФ-лул ХIукумат, СКФО-лул регионну, полпредство ва бизнес. Хъунмур масъалану хъанахъиссар бувчIаву – щин ва цукунсса кумаг буван аьркинссарив», – кунни батIаврий Алексанр Новаклул.
Вице-премьернал бусаврийну, ХIукуматрал ххал би­гьинтIиссар кредитирттал процентирттал ставкарттан субсидированиялунсса арцу личIи дувансса чаранну. Лябуккулул проектирдал аьмсса багьа хьунтIий бур 1,7 трлн къурушру. Ми проектру бартдигьаврийну бюхъантIий бур дузал буван сайки 80 азарва зузи кIану.

Дагъусттаннал БакIчинал махъ лавхъунни республикалий лябуккулул проектру бартдигьаврил давурттал хIакъираву.
Сергей Меликовлул тIиму­ний­ну, ДР-лул Лябуккулул экономикалул модельданул лагрулуву ккаккан дурну дур лябуккулул инвестициярттал 5 проект 335 млрд къурушрансса: «Каспийскаллал кластерданул лябукку», «Кьиблалул Дагъус­ттаннай ахъул­ссаннул ва ахънилссаннул кластерданул лябу­кку», « Пюрундалул промышленностьрал кластерданул лябу­кку», «МахIачкъала» аэропортрал реконструкциялул кIилчинмур ятIап»», «Усру дувултрал шагьру» тIисса стратегиялул проект бартдигьаву. Республикалул каялувчинал гьартану бувсунни мукунма гьарца проект бартдигьаврийну циксса зузи кIанттурду дузал хьунтIиссаривгу.

СКФО-лул субъектру лябуккан баврил экономикалул модельдануву ккаккан дурну дур 35 приоритетсса проект. Ми цинярда ххал дувантIий дур личIи-личIину, цIанасса социал-экономикалул шартIругу хIисавравун ларсун.