Апрельданул 20-нний Ваччав Ккуллал райондалул культуралул ва бигьалагаврил центрданий хьунни райондалул оьрчIал «Мы ищем таланты» тIисса цIанилусса конкурс. Ва хас дурну дия Аьрасатнал Виричу НурмахIаммад ХIажимахIаммадовлул аьпалун.

Мунил сакиншинначину ва сиптачину бия Райондалул культуралул ва бигьалагаврил центр. Конкурсрал хьхьичIсса агьамми мурадру бия гьарцагу оьрчIавусса гьунарду ялун личин баву, оьрчIру музыкалул ттизаманнул творчествалул журардахух гьан баву, цала гужирдайн, гьунардайн цивппа вих баву.

Шадлугъ дайдихьлай, ихтилат бувна райондалул бакIчинал хъиривчу Анатолий Давдиевлул. Ванал бувсуна конкурсрал мурадирттая, чIа увкуна цинявннан цIуллушиву ва дуллалимуниву тIайлабацIу. Бувсуна Виричу НурмахIаммад ХIажимахIаммадовлул оьрмулия.

Конкурсрай гьуртту хьуна щаллагу райондалиясса оьрчIру – цинявппагу 15 коллектив. Гьарцагу коллектив хъинну ххуйну хIадур хьуну бия. Анатолий Давдиевлуя, ХIабибуллагь Кьурбановлуя, Гулжагьра Рамазановая, Асият МахIаммадовая ва РайхIанат Оьмаровая сакин хьусса жюрилунгу бигьану бакъая язими коллективру личIи буван. Къабигьанугу, 1-мур кIану буллуна Ккуллал райондалул культуралул ва бигьалагаврил центрданучIасса оьрчIал коллективрахьхьун, 2-мур кIану – ЧIяйннал культуралул къатлучIасса оьрчIал коллективрахьхьун, 3-мур кIану – Вихьуллал культуралул къатлучIасса оьрчIал коллективрахьхьун.
Ххув хьуминнан буллуна дипломру ва дуруна бахшишру.