Лакрал райондалул Магьирлугърал къатраву хьунни Космонавтикалул кьинилун хас дурсса мероприятие.
Шиву буссар инсан космосравун цалчин левххун 60 шин шаврил ва Дагъусттаннал увагу усса ца космонавт Муса Маннаровлул оьрмулун 70 шин шаврил юбилейрдан хас бувну тIивтIусса мурцIурду: ца аьмну аьламрал тарихран, цагу – Муса Маннаровлун цIа кусса.
Мероприятие сакин дурну дия райондалул библиотекалул зузалтрал. Гьуртту хьунни муний Гъумучиял школалул 8-мур классрал дуклаки оьрчIру.
Библиотекалул зузала ПатIимат ЛухIуевал бувсунни Аьрасатнал Космонавтикалул авадансса тарихрая. Цалчин аьламравун левхсса Юрий Гагариннуя, Дагъусттаннал цалчинсса ва увагу усса космонавт Муса Маннаровлуя.
Дуклаки оьрчIал дурккунни Юрий Гагариннун ва Муса Маннаровлун хас дурсса назмурду.
Космонавтикалул кьинилун хас дурсса мероприятияртту хьунни Лакрал райондалул сайки гьарцагу школалий.
ГьунчIукьатIрал библиотекалул зузалтрал дуклаки оьрчIан бунни Гъумукун Муса Маннаровлул музейравунсса экскурсия. ОьрчIан кIул хьунни Муса Маннаровлул оьрмулиясса цIу-цIусса лахIзарду, ккарккунни аьламравун ларххун диркIсса янна ва цаймигу затру.
