Мудангу кьадрулийсса цIанил заллу

Оьмаров Забиюллагь (урчIах) дустуращал

Уттигъанну цала оьрмулул 75 шинал юбилей кIицI ларгунни Аьлиттаттал арс Оьмаров Забиюллагьлул.

Цала жяматрал дянивгу, щалагу Къизлардал шагьрулул ва райондалул лагрулийгу ванал цIа мудангу хIурматрай зумух ласай­сса цIа дур. Му кьадру-кьимат хIа­лалгу бувну бур ванал цала оьр­мулуву бартбигьлай ивкIсса хъин-хъинсса мурадирттайну, иширттайну, дугърисса ва ас-намус ххисса хасиятрайну, инсаншиврул ххуллу-ххуттайну.
Увну ур Забиюллагь 1947-кусса шинал Къяннал шяраву Буттал кIанттул цIанийсса Хъунмасса дяъвилул гьурттучи Оьмаров Аьли­ттаттал кулпатраву.
Гиччава най унува дуккавривугу, давривугу итххявхсса, зирангсса оьрчIну ивкIун ур Забиюллагь. Школагу лайкьну къуртал бувну, армиялул буржгу лавхъун махъ, ванал захIматрал ххуллу байбивхьуну бур Къизлардай, га чIумух бурувгун, хъинну хъуннасса автохозяйствалий. Гьарцагу чулуха гьунар хьхьичIунсса зунттал арс зийгу ивкIун ур гикку, щупирнал пишалия айивхьуну, директорнал къуллугърайн ияннин.
Муния мукьах тIурча, ва ивтун ур Къизлардал райондалий­сса «Путь Ленина» тIисса совхозрал директорну. Бартдигьлайгу ивкIун ур му жаваблувшиву ххи­сса даву ххаллилсса даражалий.
Гиккува, Къизлардал шагьрулий, ванан кьисмат хьуну бур буцин оьрус миллатрал хъамитайпа – Надежда Николаевна. Вайннал дянив бивзун бур шанма оьрчI – кIия арс ва ца душ.
Оьрмулул юбилейгу барча дуллай, лакрал ххаллилсса арс, мажлисирттал усттарсса тямада, оьрмулуву диялсса кьурчIишивурттугу духIан багьсса, ми яхI ялттуну дугу-дурхIусса чув-адамина, Аьли­ттаттал арс Забиюллагьлун чIа тIий буру цIуллу-цIакьшиву, цала буцириннал дянив хIалимсса, нахIусса оьрмулул шинну, ялуннайсса ххари-хъиншивуртту!
Дустал, гьалмахтал