Вай гьантрай ЦIуссалакрал райондалий Чапаево шяраваллил жяматращал хьунабавкьунни ДР-лул Халкьуннал Мажлисрал Законодательствалул, закондалул, паччахIлугърал строительствалул, кIанттул цила каялувшиндарал ва регламентрал комитетрал председатель Артур Исрапилов, ЦIуссалакрал райондалул бакIчи МахIаммад-ХIажи Айдиев, Чапаево шяраваллил администрациялул хъунама Марис МахIаммадов ва Чапаево шяраваллил 2-мур школалул директор Камил Аьлиев.

Жяматращалсса хьунабакьаврий ххал бивгьунни махъсса ппурттуву шяраву хьусса ишру ва цIурювкьусса масъалартту. КIицI лавгунни шяраваллил социал ва культуралул даража гьаз бансса чаранну. Цаппара масъаларттал хIакъираву ккавккунни ми дузрайн буккан бансса чаранну.

ХъунмурчIин агьалинал су­кку бувсса масъаларттавасса бия ттукIрал, шярава ччюрк дуккан даврил, ххуллурду бакьин баврил, хIатталлу марцI даврил хIакъиравусса. Мукунма жяматрал ихтилатру бунни чIава жагьилтал наркоманиялия, хIан хIач1аврия ва цайми-цаймигу бавкку ххуллурдая мюхчан баву мурадрайсса.
МахIаммад-ХIажи Айдиевлул цала ихтилатраву кIицI лавгунни оьрчIан кIулшивуртту ва тарбия дулавриву учительнал бияла хъунмасса бушиву.
ЦIанасса ппурттуву жагьилтал диндалул тIайласса ххуллийн кIункIу баврия ихтилат бунни ЦIуссалакрал райондалул Имамтурал советрал председатель Мансур Хаваевлул. Ванал бусаврийн бувну, Конституциялул законнал ва исламрал кьануннал чIявусса аьм­сса затру бур инсантал дусшиврий ва бавкьуну ялапар шаврицIун бавхIусса. ХIакьинусса кьини Аьра­сатнаву ялапар хъанахъисса бусурман инсантураща дайшишру дакъа бюхълай бур цала дин дуллан ва Конституциялул законну дуручлан.
Ихтилатру буллалиминнал кIицI лавгунни оьрчIан рувхIа­нийсса тарбия къадулаврийну ми соцсетирдайхчIин бигьанма цайминнал биялалийн лавгсса ва бяйкьусса ишру нитти-буттайссагу тахсирну хъанахъишиву. Хьунабакьаврил хIасиллу дуллай, 20 инсанная сакин бунни шяраваллил Жяматийсса совет.

– Укунсса хьунабакьавуртту, жяматран дакъассагу, райондалул каялувчитуран ва депутатътурангу хъуннасса агьамшиву дуссану хъанахъиссар. Шикку исват шай щаллу бувсса ва дузал бан аьркинсса масъалартту. Депутатътал тIурча, мудангу хIадурну буссар, шайсса кумаг бувну, чIарав бацIан. КIицI лавгсса масъала цуппа ца къулагъас къадурну къакьабитантIиссар, – увкунни Артур Исрапиловлул.