Ларгсса тталаткьини МахIачкъалалив Дагъусттаннал Жяматийсса палаталуву хьунни республикалул СМИ-лул Жяматийсса палаталущалсса ва граждан обществалул институтирттащалсса дахIаврин хас бувсса ккуркки стол.

[dropcap]Ш[/dropcap]икку гьаз бувсса ца агьам­сса масъалану бия социал сетирдайхчIин къалпсса информация (фейкру) ппив буллалаврин ххуллу кьукьин аьркинну бушивруцIун бавхIусса, хаснува Украиннай хъана­хъисса ишир­ттая щялусса хаварду ппив буллай бушиву, ва ми гассят паччахIлугърал СМИ-рдал инкар буллан аьркиншиву, жяматийсса иш­ккаккултрал, активистътурал, экспертътурал пикрирдугу хьхьичIун лавсун.

Жяматийсса палаталул пред­седатель Аьбдулмуъмин Ибрагьимовлул кIицI ларгунни республикалул информациялул политика хьхьичIуннай дуваву мурадрайсса рекомендацияртту. Мукунма маслихIат бунни агьамсса масъалартту ххал бигьаваншиврул ччя-ччяни медиа ресурсирдал площадкарттай, сий дусса экспертътурайнгу оьвкуну, ккуркки столлу буваван.

[dropcap]К[/dropcap]куркки столданий гьурттушинна дунни региондалул информациялул ва печатьрал агентствалул хъунама Аьбдуразакь Жамалуттиновлул, национал политикалул ва диндалул иширттал министр Энрик Муслимовлул ва цаймигу паччахIлугърал къуллугъчитурал. Докладру бунни Дагъус­ттаннал Жяматийсса палаталул председательнал хъиривчу Буниямин МахIаммадовлул ва палаталул вакилтал Абсалуттин Мурзаевлул, Алюсет Аьзизхановлул.

Ккуркки столданий гьаз бунни миллатирттал прессалул Дагъусттаннал мазру ябаврил ххуллий хъуннасса даву дуллай бушиврул ва миллатирттал прессалун кумаг аьркинну бушиврул суаллугу.