Ухссавнил Ккавкказнал республикарттал миллатирттал театрдал дянив кувннал кувнначIансса гастроллал агьамшиву ялу-ялун хъун хъанай дур, миннуйну, тамашачитурал аудиториягу гьарза-гьарта хъанай, театрдал коллективрдал кувннал кувннащалсса дусшиврул ва уртакьшиврул арардугу цIакь хъанай, кувнная кувннал усттаршиву лахьхьин бюхълай бушиврийн бувну.
[dropcap]Ч[/dropcap]Iаххувсса республикарттайн уртакьшиврийсса гастроллай А. Къапиевлул цIанийсса Лакрал паччахIлугърал драмалул ва музыкалул театр занай буссар 2012-ку шиная шийнмай. Гьарца шинал лув-ялув «Культура России», «Большие гастроли» Федерал целевой программардал лагрулий Аьрасатнал ва Дагъусттаннал Культуралул министерствардал кабакьаврийну театр сайки кIил-кIийлва, шам-шамийлва гастроллай лавгссар Владикавказ, Астрахань, Нальчик, Баксан, Пятигорск, Грозный, Майкоп, Элиста шагьрурдайн.
[dropcap]В[/dropcap]ана ттигъаннугу хъунмасса тIайлабацIулущал зана хьунни Элиста шагьрулия. Вай кIилчинсса гастроллур Лакрал театрданул Къалмукьнал Оьруснал драмалул ва комедиялул театрданучIансса. Цалчинсса хьуссия 2019-ку шинал.
Къалмукьнал Оьруснал театрданул завлит Ирина Горяшкиевал бусаврийн бувну, тайннал тамашачитуран дакIний ливчIун бия театрданул репертуардануву агьамсса кIану бугьлагьисса шанма спектакль: дунияллул драматургиялул бюхттулшиврун ккаллисса Шекспирдул ца яла машгьурмур пьеса «Гамлет» (Болгарнал режиссер Богдан Петканиннул бивхьусса), Апанни Къапиевлул аьрали чичрурду гьануну ларсъсса театрал поэма «Невыплаканные слезы» (Аьрасатнал магьирлугърал лайкь хьусса ишккакку Ислам Казиевлул бивхьусса) ва А. Усачевлул оьрчIансса спектакль «Айболит» (режиссер Дагъусттаннал халкьуннал артист Аслан МахIаммадов).
«Щала шагьру зух ялугьлай буссар» тIисса ванил махъру мяйжаннугу щялу къавхьуна. Азаллий ххюцIалунния ливчусса тамашачитал бувкIуна У. Шекспирдул «Тарс мютIи баву» спектакль ккаккан. Спектакль сий дусса к1ира фестивальданий лавайсса кьиматран лайкь хьуну бушивриягу хавар бия вайннан.
ДакIнийн бутанну, ларгсса шинал «Укрощение строптивой» спектакль дипломат хьуссар Грозныйлий хьусса «Федерация» тIисса Щалагу Аьрасатнал Миллатирттал театрдал фестивальданий. МахIачкъалалив хьусса Дунияллул халкьуннал миллатирттал театрданул к1илчинмур фестивальданий тIурча, лайкь хьуссар «Гран-Прилун», ххув хьуссар ялагу кIива номинациялий «Язимур режиссура» (Ухссавнил АьсатIиннал ва Къабардин-Балкьарнал лайкь хьусса артист Гиви Валиев) ва «Язимур хъамитайпалул роль» (Дагъусттаннал лайкь хьусса артистка Зинаида Чавтараева). Ххуйну кьамул бувуна спектакль Владикавказрайгу.
Хъатру ришлай, итакъабакьлай бия тамашачитал жула артистътал. Мяйжаннугу жула артистътурал гьунарданул хIайран бувссарив, ягу цивппа драматургиялул кьимат кIулсса буссарив къакIулли къалмукьнал агьлу, хьхьичIмур аьрххилийгу ва базилухгу хъинну ххарину ва бусравну, щакъалиххавай кьамул бунни жула артистътал Элисталий. Лахъисса ва бизарсса авлахърайхсса ххуллугума хIисаввагу къавхьуна махъунмай нанийни.
– Лакрал театрданул актертурая лахьхьинмур чIявуя цалчинсса гастроллайва. Таний жу хIайран хьуну ливчIунав жагьилсса актертурал Шекспирдул шеърирду усттарну ва лугъат бакъа ккалаккаврий. Театрал вузру къуртал бувминнащагума къашайссар шеърирду усттарну буккин. Ва базилухгу жу хIайран бувунну актертурал дакIнийхтунусса тIуркIулул,– тIий ия Къалмукьнал Оьруснал театрданул хъунама директор, Къалмукьнал халкьуннал артист Виктор Хаптаханов.
– Ларгсса гастроллайсса спектакллу ккаккан къавхьуна ттуща. Амма ккавкми байкъалитIавай буслай бия асардая. Мяйжаннугу, Шекспирдул произведение бюхттулсса даражалий ккаккан бан бюхъайсса актертурал труппа чIивисса миллатрал дянив бушивув — му аьламатсса иш бакъарив, туну», – тIий бия Къалмукьнал Миллатрал телевидениялул журналист Светлана Аджиева.
– Жун укун дакIнийхтунусса ва бюхттулсса даражалул тIуркIу къаккавкссар, – тIий, иттату макь лихьлай, най бия «Пушкиннул карталийхчил» билетру лавсун, бувагу цалчин театрданувун бувкIсса студентътал.
[dropcap]Ч[/dropcap]Iаххувсса республикарттал дянив магьирлугърал ламурду цIакь баврил ххуллий уртакьшиврийсса гастроллал агьамшиву хъуннасса душиву кIицI лаглай, Виктор Хаптахановлул Лакрал театрданун буллунни Къалмукьнал культуралул ва туризмалул министрнал цIаниясса Барчаллагьрал чагъар.
Лакрал театрданул директор МахIаммад ХIусайновлул барчаллагь увкуна Къалмукьнал Оьруснал драмалул ва комедиялул коллективрахь, гастроллу лавайсса даражалий сакин дансса кабакьаврихлу, тамашачитурахь — хIурматрайсса хьунабакьаврихлу.
Гастроллал лагрулий «Калмыкия» РИА-лул пресс-центрданий хьунни республикалул паччахIлугърал телерадиокомпаниярттал ва кказитирттал журналистътуращалсса пресс-конференция. Муний гьуртту хьунни Виктор Хаптаханов, МахIаммад ХIусайнов, артистътал Зинаида Чавтараева, Ибрагьим Мусиев, Артур Абачараев, Зульфия Архилаева, Руслан Ларин.
Пресс-конференциялий ихтилат бия театрданул тарихрая, репертуардания, гастроллал даврия.
