Апрель зурул 24-нний ссят ххюннил дачIинний МахIачкъалалив «Сальва» тIисса банкетру бай залдануву лакрал хъаннил ифтар дикIан тIий дур.

Дагъусттаннал Муфтиятрал просвещениялул отделданул зузала Аьбдуллаева Ххадижатлул бувсунни, Ися Идавсил (аьлайгьи ссалям) цIанийсса РувхIанийсса центрданий лакрал агьалинал ифтар дикIан тIий дунугу, хъами цивппалу бавтIсса ифтаргу дуван пикри хьушиву ва миккун арсру Украиннавусса дяъвилул иширттаву ливтIусса ниттихъайн, кулпатирттайн оьвтIий бушиву.

«Виртталсса арсру тарбия був­сса ниттихъахь барчаллагь учаву жулва цинявннал буржри, ниттихъал дакI хьунмур бусан, миннул хIурмат миллатрачIа бюхттулну бушиву ккаккан буван бувкIун ччи­ссия жун бучIан бюхъаймивагу», – увкунни Ххадижатлул. Ванил ттухь тавакъю бунни, виртталну жанну дуллусса лакрал язи­сса арсурваврал нитти­хъан, кулпатирттан баян буван, оьвчин, бакIра-бакIрах гьарманачIан оьвчинсса хIарачат буванну, цучIав лях лавгун къаличIан, лажинни, баян бувара зугу зунма кIулцириннан.

Аьдатравун дагьсса лак­рал агьалинал аьмсса ифтармур дикIантIиссар апрель зурул 28-нний Редукторный поселокрай цIуну буллалисса РувхIанийсса центрданий. Ихтилатру бувантIиссар лакрал миллатрал вакилтурал, динчитурал-аьлимтурал, дуссар диялсса программа, нашидру, розыгрышру, бахшишру. Шиккува дакIнийн бутан, дукIу лакрал ифтарданийн сайки ххюазарунниха ливчусса лак бавтIун, жува цачIун батIин, куннал кув бугьан кIулсса миллат бушиву ккаккан був­ссия. Гьашинугу вава даражалий, чIявусса лак бавтIсса, лахъисса хIаллай дакIурдиву, дукIува кунмасса, гъилисса асарду кьабитан­сса ифтар хьунссар тIий бур ваниха зузими.