Лакку ссурваврал мажлисрал чаннасса лахIзарду

Апрель зурул 24-нний МахIачкъалаливсса «Сальва» ресторандалувун бавтIун бия лакрал хъами, ца урцIух ккуркки лавгун, зумарду итадакьин.

Шанттуршуннияр ххишаласса лакку хъами бавтI­сса ва даврил хъунмур хъар цайнна ларсун дия Дагъусттаннал Муфтиятрал просвещениялул отделданий зузисса жулва лакку душваврал ва «Гьидаят» тIисса исламрал центрданий дуклакисса душваврал. Мажлис байбишиннин цал душру Муфтиятрал къатравух экскурсиялий бувцуна. Мубараксса Кьурандалул аятру ду­ккаврия байбивхьуна цуппа мажлисгу. Сайпуллагь-Кьади Башларовлул цIанийсса мизитрал имам МухIаммадрасул МахIадовлул кIицI лавгуна ислам дин цIакь хъанай дачиннин душваврал оьр­мулул кьимат къабивкIшиву, ислам цIакь хъанахъиссаксса хъамитайпалул кьадругу, хIурматгу гьаз хъанай бавчушиву. Бувсуна гьарцагу адаминал оьрмулуву, багьу-бизулуву, усттарну къатта-къуш бачин бувавриву, оьрчIан ххуй­сса тарбия дулавриву хъамитайпалул бияла хъунмасса бушиву. Ванал барчаллагь увкуна, цивппагу цIакьну диндалул ххуллий бавцIуну , махъмигу му ххуллийн кIункIу буван хIарачат буллали­сса лакку душваврахь.

Ва кьинисса гьануми ихтилатругу бия гьарцагу кулпатраву рувхIанийсса ххуйшивуртту хьхьичIунну дикIан аьркиншиврия, мяърипат дуну къуццу тIун аьркиншиврия, тарбиялул гьанурдая, ниттил мазгу ва бу­ттал улчагу ххирану бикIан аьркиншиврия.
Дагъусттаннал гуманитар институтрал преподаватель, философиялул элмурдал доктор Асият Буттаевал цилвамур ихтилатраву кIицI лавгуна хIакьину билаятрай аьратталсса чIун душиву, дакьавричIан дир­сса цичIар дакъанугу Аьрасатнал чиваркIуннан билаятрал мурадру буруччин багьлай бушиву. Ванил бакIра-бакIрах дурккуна жанну харж дурсса лакрал вирттаврал цIарду: ХIажимахIаммадов НурмахIаммад, Чаннанов МахI­муд, Исупаев Леонид, ХIа­жиев АсхIад, Дибиров Дибир, Исяев Мурад. Ванил бувсуна Аьра­сатнал агьалинал мюхчаншиву дуруччаву мурадрай жанну кьурван дурсса вирттаврал ни­ттихъайнгу оьвкушиву, миннухь Вирттал тарбия буваврихлу барчаллагь учин. Цуппа бакI гьаз дувансса хIалданий ба­къанува, мажлисрайн бувкIсса Шамсият Оьмаровахь — Чувшиврул Орденналун лайкь хьу­сса МахIмуд Чаннановлул ниттихь циняв ниттихъахь хIисаврайсса барчаллагь увкуна.
Муфтиятрал просвещениялул отделданул зузала Аьбдуллаева Ххадижатлул бувсуна, лакрал хъами бавтIсса ифтар цалчин дуллалисса даву духьукун, цукун хьунавав тIий, пикрирдай бивкIшиву, зал бувцIуну, душру щябитансса кIанттурдах луглан багьайхту, дакI ххаришиврул асардал дурцIушиву.


— Лакку билаятрал ссурвал тIи­сса цIа дизарду жу ва жулва мажлисран. Исламрал диндалул ххуйшиву мугур, оьрмулул шинну, жагьилма, угьарама личIи акъа, къакъуллугъру личIи бакъа, циняв агьлу цачIунмай бувайшиву, — увкунни ванил.
Эльвира Нуруттиновал бувсунни Муфтиятрал хIасул бувсса, ташурду бувангу, буруччингу кумаг буллалисса «Уют» тIисса кулпатрал институтрая, кулпат гьарцагу инсаннал оьрмулул гьану хъанай бушиврия.

Вава просвещениялул отделданул зузала Анисат Аьб­дуллатIиповал увкунни базу-базурдавун дюххансса нашидру. «Гьидаят» центрданул душваврал ккаккан бунни МухIаммад Идавсил (с.аь.с) оьрмулуцIун бавхIусса сценка. Дия исламрал кIулшивуртту ххал дуллалисса викторина-конкурсгу. Гьурттушинна дунни пасихIну ва бюхханну аятру дурккусса мюрщи оьрчIалгу. Дагъусттаннал халкьуннал арстистка Саният Рамазановал увкунни халкьуннал балай.

Ахирданий исламрал мероприятиярттай чялишну гьур­тту хъанахъиминнан ва ифтар дуван арцуйнусса кумагру бувминнан буллунни Муфтиятрал ва АНО ДО « Гьидаятлул» чулуха­сса Барчаллагьрал ча­гъарду. Укун­сса Барчаллагьрал чагъар ифтарданун кумаг був­сса ЖахIпар Абуевлунгу бушиву бувсун, мунал цIагу барчаллагьрай кIицI дурунни. Мукунма барчаллагь баян бунни зумаритавал ссупралийн цила чулуха лакку дукрарду гьан дур­сса «Инт» кафелул хъунмур Кьурбанова Саидатлуйнгу. Спонсор хIисаврайсса кумаг бувсса ва Барчаллагьрал чагъарданун лайкь хьусса Рашидлул душ Умаханова Зульфиял увкусса, ифтарданул барачат щалвагу миллатрайн бияннав , лакрал цIа-кьини танийра кунна дюхъаннав, аргъ дизаннав тIисса дуаьлул махъру мажлисрайсса гьарца хъамитайпалул зумувсса махъру бия.