ЛачIун буккаврил НурмахIаммад ХIажимахIаммадовлул цIанийсса турнирданий

Аьрасатнал Виричу НурмахIаммад ХIажимахIаммадовлул аьпа абад баврин хас дурсса лачIун буккаврил Аьрасатнал юниортурал дянивсса первенство тIитIаврий гьуртту хьунни ДР-лул ХIукуматрал председатель Аьбдулмуслим Аьбдулмуслимов.

Турнир най дия Каспийскалий, Аьли Аьлиевлул цIанийсса спортрал ва жагьилтурал чIалъаьлуву. Муний гьуртту хьунни сайки 400 лачIунукку.
Хъамаллурахь ва турнирданул гьурттучитурахь аьла-ссалам буллай, Аьбдулмуслим Аьбдулмуслимовлул дурккунни ДР-лул БакIчинаятусса барча баврил адрес:
«ХIурмат бусса гьурттучитал ва сакиншинначитал, хIурмат лавайсса хъамал! На зу барча буллай ура Аьра­сатнал Виричу НурмахIаммад ХIажимахIаммадовлул цIанийсса лачIун буккаврил юниортурал дянивсса Аьрасатнал первенство тIитIаврищал.

ЛачIун буккаврил инсаннаву тимар дайссар кьянкьашиву, цала мурадирайн кIункIу тIутIаву, захIматрахсса мюхтажшиву, цала хьхьичIсса циняв захIматшивурттугу дух дурну, ва хьун айссар хIакьсса адамина, цIакьсса Ватан дуруччу. Мукунсса ивкIссар Аьрасатнал Виричу НурмахIаммад ХIажимахIаммадов, 25 шинаву­сса жула ватанлув гьуртту хьуссар чIявусса душмантуращалсса талатавриву ва, хIучI къакуну, цала чувшиврийну аьзизсса улклул цIа дуккан дурссар.

Ганал бивтссар кутIасса, амма яргсса оьрму: га ия къучагъсса хIаписар ва десантник, хъинну дурккусса инсан ва ххаллилсса спортсмен, ганал дия чIярусса наградартту. Мунийн бувну, ттизаманнул спортсментуран НурмахIаммад хьун аьркинссар патриотшиврул ва чувшиврул эбратну», — тIий бия адресрай.
Хъирив махъ лавхъунни АьФ-лул ПаччахIлугърал Думалул Обороналул комитетрал председательнал цалчинма хъиривчу, Аьра­сатнал Виричу Андрей Красовлул.
Махъ лавхъунни мукунма НурмахIаммадлул ппу Энгельс ХIажимахIаммадовлулгу. Мунал барчаллагь кунни турнир сакин дурминнахь, ва цала арснал аьпа абад баврин хас даврихлу.
Турнирданул гьурттучитурайн лаизлазисса махъ лавхъунни мукунма Аьрасатнал ЛачIун буккаврил федерациялул президент Михаил Мамиашвилил. Мунал бувсунни вания тийннай юниортурал дянив хьунтIисса циняв чемпионатирттан дизлазишиву НурмахIаммад ХIажимахIаммадовлул цIа.
Турнирданий финалданул хIасиллу укунсса хьунни:
МусттапахIажи Малачдибиров (Дагъусттан) – Тимур Котаев (Красноярск) – 5: 2 (86 кило).
МахIаммад Шарипов (Дагъусттан) – Алан Плиев (Алания) – 6:0 (92 кило).
Аьбдулла Кьурбанов (Краснодар) – АхIмад Тажуттинов (Да­гъусттан) – 10:3 (97 кило).
Аслан Абакаров (Дагъусттан) – Артем Пуховский (Москавуллал улча) (125 кило).