Кумаграл ка

Дагъусттаннал ЗахIматрал ва соцразвитиялул министерствалул агьали социалныйну буруччаврил идарарттал зузалт чялишсса гьурттушинна дуллай бур республикалийн Украиннава лихъа бувккун бувкIсса кулпатирттан кумаг бан.

ЦIуссалакрал райондалул социал хIаллихшиннардал центрданул пишакартурал хъуннасса даву дурну дур Донецкаллал ва Луганскаллал республикарттая лихъа був­ккун, ТIюхчардал шяраву цала гъанчуначIа бавцIусса Мамай Магьдиевлул, Юлия Левченкол ва Эльвира Левченкол кулпатирттан кумаг баврил ялув. Кумаг хIисаврай вай кулпатирттан диян дурну дур дукия, янна-ка ва чара бакъа аьркинмур.

МахIарамкантуллал райондалул соцзащиталул центрданул зузалтрал Луганскаллал республикалия лихъа бувккун Гарах шяраву уссичIа ливксса Шахзад Гейбатовлул кулпатран, дукиялийну ва лаххиялийну бакъасса, ялагу кумаг бувну бур Аьрасатнал паспорт ва банкрал карта ласун.
Вара райондалул социал центр­данул зузалтрал прокуратуралул зузалтращал архIал Донецкаллал республикалия Советское шяравун бувкIсса Рамазановхъал кулпатрал ялтту буккан лавгун, бувчIин бувну бур лихъачалтран дагьайсса хIаллихшиннарду цукун тIалав дан аьркинссарив, учиннуча, медициналул кумаграл хъирив буккан, чIумуйнусса даврийн буххан. Вайннал оьрчI кьамул увну ур детсадрайн.

Центрданул пишакартурал кумаграцIух ЗахIматрал ва соцразвитиялул министерствалийн тIайла бувккун бур арцуйнусса кумаг тIалав буллалисса ча­гъар.
Табасараннал райондалул агьали Социальныйну буруччаврил центрданул пишакартурал кумаг бувну бур Харьковуллал областьрая увкIсса Эскер Гасратовлун лихъачунал статус булун ва арцуйнусса кумаг бан аьркинсса документру дузал бан.