[dropcap]М[/dropcap]ай зурул 13-нний МахIачкъалалив Оьруснал театрданул чIивимур залдануву хьун тIий дур композитор, музыкант, балайчи, Аьрасатнал магьирлугърал лайкь хьусса ишккакку Мазагьиб Шариповлул аьпалун хас дурсса творческий вечер.
Мунийнсса хIадуршиндарал ялув бавтIун бия вай гьантрай министр Зарема БуттаевачIа культуралул министрнал хъиривчу Мурад ХIажиев, магьирлугърал отделданул каялувчи Мариян ХIажиева, Дагъусттаннал Музыкантътурал союзрал хъунама Хан Баширов, Дагъусттаннал халкьуннал артист Аслан МахIаммадов, чичу ва драматург Марат Шахманов, Дагъусттаннал халкьуннал инструментирттал оркестрданул каялувчи Новруз Шахбазов, композиторнал душ Жамила Шарипова.
[dropcap]Б[/dropcap]атIаврий ххал бивгьунни мероприятиялул программалийн багьайсса сакиншиндарал суаллу.
Вечерданий гьуртту хьун тIий дур Дагъусттаннал халкьуннал инструментирттал оркестр, Дагъусттаннал опералул ва балетрал театрданул хор, филармониялул солистал, «Дагъусттан» ансамбльданул къавтIалт.
Дагъусттаннал эстрадалул балайчитурал цала-цала мазурдий учин тIий бур Мазагьиб Шариповлул макьаннайсса балайрду.
«Мазагьиб Шариповлул цала махъ кьабивтссар хъинну ттуршамасса творчествалул ирс, надирсса авторский композицияртту, лакрал миллатрал дакI цаву дусса ххаллилсса балайрду. Дагъусттаннал балайрдал аьдатирттайн лажинсса, мархращал куртIсса дахIаву дусса ганал творчествалул, махъ бакъа, авадан дурссар жула улклул музыкалул магьирлугъ.
Цува кIулну ивкIминнал, хаснува республикалул музыкалул ккурандалул дянив га дакIний уссар, ва жулагу мурад ххаллилсса музыкантная ва инсаннаясса аьпа ябувавур», – увкунни Зарема Буттаевал.
[dropcap]М[/dropcap]азагьиб Шарипов увну ур 1937-ку шинал март зурул 5-нний Хъусращиял шяраву. Дагъусттаннал педагогический институтрал музыкально-педагогический факультет къуртал бувну махъ зий ивкIун ур Гъумуксса ОьрчIал музыкалул школалул директорну. Муния махъ — Дагъусттаннал хорданул обществалул жаваблувсса секретарьну, Дагъусттаннал магьирлугърал училищалул дуккаврил бутIул хъунаману.
Цалчинсса биял хьусса произведенияртту Шариповлул чивчуну бур студентну унийва. Миннувух бур Дагъусттаннал музыкалул «мусил» фондравун багьсса «Вил сурат», «Агар бюхъарча, жагьил», «ХIухчил балай», «Хъусращи», «Вихшала».
Творчествалул оьрмулий бивтсса 50 шинал ххуллий композиторнал чивчуну бур 700-нния ливчусса балайрду (лакку мазрай бакъасса, Дагъусттаннал цаймигу миллатирттал мазурдий). Миннува чIявусса яхьуну бур Дагъусттаннал музыкалул «мусил» фондраву.
