Вай гьантрай республикалий хьунни «Учитель года РД – 2022» цIанилусса конкурс. Максим Горькийл цIанийсса Оьруснал драмтеатрдануву шадлугърай лахъа-хъунну барча бунни конкурсрай ххув хьусса учительтал.
Пишалул магьиршиву ккаккан дурсса учительтал барча буллалисса мажлисрай гьуртту хьунни ДР-лул ХIукуматрал председательнал хъиривчу Муслим Телякавов, ДР-лул Халкьуннал Мажлисрал КIулшивуртту дулаврил ва элмулул комитетрал председатель Елена Павлюченко, ДР-лул кIулшивуртту дулаврил ва элмулул министрнал бигарду биттур буллалисса ЯхIия Бучаев, вузирдал ректортал ва конкурсрал гьурттучитал.
Дагъусттаннай 2022-ку шиналсса яла хьхьичIунмур учительну ккалли бунни Каспийск шагьрулул 14-мур лицейрал оьрус мазрал ва литературалул учитель Олеся Петрова. «Совершенствование межкультурной коммуникации» тIисса номинациялий ххув хьунни ЦIуссаккуллал 2-мур школалул ингилис мазрал дарсирдал учитель Сулайманова Наида МухIуттиновна.
