«Забота» тIисса интернатрай Лелуххантрал кьинилун хас дурсса мероприятияртту дунни. Директор Ума Качалова каялувчину, щалвагу интернатрал коллектив вай мероприятияртту оьрчIан лелуххантрал оьрмулия цIусса затру лахьхьин буванну ва миннавун лелуххантраха аякьа дуллансса гъира бутанну хIадур дурну дия.

Нюжмардул мутталий интернатраву лелуххантрая бусласисса дарсру най дия, оьрчIру лелуххантрал чIурдах вичIи дишин буллай бия, лелуххантраясса хаварду ва магьри ккалай, суратру дихьлай, поделкартту дуллай, кьатIувсса мероприятиярттай лелуххантрал тIул-тIабиаьтрал хъирив бавцIуну бия.

Бувсуна оьрчIахь лелуххантрал оьрму лахьлахьисса «орнитология» элмулия, дурна «Лелуххант –жулва дусталли» тIисса оьрчIал суратирттал выставка. Скворечникру бувну, магъи дакъа къабивтуна интернатравун ила бивчусса лелуххантгу. Интернатрал тарбиячитурал бувсунни вай мероприятиярттал гьанумур мурад бушиву оьрчIаву экологиялул культура ларай дуваву, тIабиаьт дуруччаврил агьамшиву бувчIин буваву.