КъюмайтIутIи бугьаврицIунсса кабакьу

КъюмайтIутIи бугьаврицIунсса кабакьу

Апрельданул 2-нний Дагъусттаннайн увкIунни Аьрасатнал финансирттал министрнал хъиривчу Алексей Сазонов. ДР-лул БакIчи Сергей Меликовлул дунни АьФ-лул Минфиндалул делегациялущалсса батIаву. Му хас дурну дия кьатIаллил санкциярттал тагьарданий ДР-лул экономикалун кумаг баврил масъаларттан.

«Жу мюхтажну буру власть­рал федерал органнал мас­лихIатирттах, цанчирча, гьарца кьини кьамул буллай буру кризисрал тагьар духлаган даврицIунсса хIукмурду. Жун хъинну аьркинну бикIай му­кунсса низамрай ласаван тIай­ланмасса маслихIатру (консультацияртту) федерал пишакартураяту», – увкунни Сергей Меликовлул.

Республикалул каялувчинал тIимунийну, республикалул машинарттал ччуччиялул багьри ялавай багьну бунугу, миннуйн хъарсса цайми хъуслил багьри ялавай багьну бакъар. Мунал властьрал профил органнал каялувчитурайн тапшур бунни, му тагьарданул анализ дурну, хъиривмур Оператив штабрай бусан, тагьар циван даххана къахъанахъиссарив.
«ХIакьину хъуннасса мяъна дуссар кIанттурдал бюджетру цалий бацIан баврил. МаслихIатру ккавкссар муниципал сакиншиннардал администрациярттащал луртандалул фондру сакин баврил хIакъираву», – увкунни ДР-лул БакIчинал.

Алексей Сазоновлул тIи­мунийну, кьатIаллил санкциярттал тамансса даххана дуллай дур экономикалул шартIру: «ЦIанасса ппурттуву хъуннасса агьамшиву дуссар экономикалуву цалий дацIаву хьун даврил ва цIусса тагьардануву зун аьдат шаврил. Гьарца региондалий тагьар личIи-личIисса дур. Мунияту жун ччай бур зул масъаларттах, тIалавшиннах вичIидишин», – увкунни ванал. Сазоновлул бувсунни таможнилул, налогирттал, аьракьи дуккан даврил лагрурдавусса бизнесирттан кумаг баврил чаранная.

ДР-лий кьатIаллил санкциярттал тагьардануву экономика цалий дацIан даншиврул дуллалисса давурттал хIакъираву бувсунни ДР-лул ХIукуматрал Председательнал цалчинма хъиривчу Руслан Аьлиевлул. Мунал бувсунни налогирттал ставкартту ялавай буллалисса закондалул проект хIадур дурну душиврия.
БатIаврий махъру лавхъунни мукунма АьФ-лул Финансирттал министерствалул цаймигу вакилтурал.

БатIаврия махъ Алексей Сазоновлул журналистътурахь бувсунни Аьрасатнал Минфиндалул делегациялул Дагъусттаннай дурсса давурттал хIасиллая.

Читайте также: