Жулвами кьакъабитайссар!

Жулвами кьакъабитайссар!

ВанацIун цIакь хьуну дур талатисса хIакиннал статус

ХьхьичIвагу «Илчилул» бу­ккултрахь бувсъссия, коронавирусрал азарданун къалхан дургьуну, «ятIул зоналий» зий ивкIсса хIакинная, Москавуллал Филатовлул цIанийсса № 15 азарханалий реаниматолог- анестезиологну зузисса, ЧIурттащиял шяраватусса Аьбдулмаликлул арс ХIусманов ХIусманнуяту.
Билаятрай яла хъунмур ин­фекционный госпитальданун хIисавсса азарханалий зузисса, лаваймур категориялул анестезиолог-реаниматологнал даврияту чIярусса суратругу рирщуну, бувсуна щаллагу дунияллий машгьурсса «AP NEWS» тIисса агентствалул.
Дурусну ца-кIира нюжмардул хьхьичI ттун ХIусман ХIусманов ккавккуна Аьрасатнал телевидениялул цалчинмур каналданий цIусса хавардал передачалий. ОРТ-лул журналистътурал бувсуна ва Украиннаву щавурду дирсса, цIунцIияртту хьусса аьра­литал ва граждан агьлу ххассал буван цивппа хушрай бувкIсса хIакинтуравух ушиву. Ттун ванащал телефондалувух ихтилат бувансса сант дагьаннин, ттуяр хьхьичIун увккун лявкъунни Москавливсса «Дагъусттан» Культуралул центрданул президент Арсен ХIусайнов. Ва тавакъю буллай ия Дагъусттаннал Культуралул центрданул членнугу хъанахъисса ХIусман Аьбдулмаликовичлул Украиннавунсса аьрххилия балжину бусияра тIий.
ХIусман ХIусмановлул цаланияр хъинну щил бусанссар цанма тийх ккавкмуния ва асар хьумуния. Булунну ванахьхьун ца­хьхьунма махъ.
– Коронавирусрал азарданул къашавайми чан хьусса тагьар духьувкун, Украиннаву аьрали спецоперация байбишайхту, ттун ти­ккусса аьрали гьалмахтуран кумаг буван ччан бивкIуна. ЦIанасса ппурттуву ттуятува тикку хайр-мюнпат ххишалану бикIанссархха тIисса пикри бия ттуву. ДакIнил куртIний мудангу бакъарив армия –ттулва кIанур, призванияр тIисса пикригу. Нава яхъанай ивкIсса кIанттайсса военкоматрайн лавгра. Призыв дакъар увкунни, так контракт цIакь дурминнан дакъа. Ца зурува аьрали гьалмахтурал ттучIан тIайла дурккунни Донбассрайсса семинарданий (минарду пIякь увкуну, цIунцIияртту хьусса, щавурду дирсса агьлу хъин буллалисса хIакинтурансса семинарди му) цIакь дурсса онлайн-журалул ссылка. Лахъи къабан, му ссылкалийну бувчIунни Украиннавун гьан хьунтIишиву так нава зузисса кIанттай отпуск лавсун хушрай 14 ягу 28 гьантлийсса.На му ссылка ккала­ккийни метролуву уссияв. Га­ссят гиккура дуцIин дував, даврий отпуск лавсун, 14 гьантлий­сса гьан ччай ушиву мяйжан буллалисса, чагъар-форма. Хъирив кьини кIюрххила ттучIан оьвкунни «Единая Россия» партиялул вакилнал. Украиннавун хIакинтал тIайла буккан ччи­сса даврил сиптачитал му партиялул вакилтал бия. «Единая Россия» партиялийн вихшалагу духьувкун, сукку хьура нагу ачин. Так Ростоврая та уккан­ссарив ккаккан бувну бакъая. Нава зузисса азарханалул хъунама хIакиннащалгу маслихIат ккавккун, мукьва гьантлува лавг­ра Ростоврайн. Тикку жул группалувун хIала хьунни Москавлиясса ва Краснодардаясса кIия хIакингу. Мукьра ссятрава жу Луганнал республикалул дазуйн бивру, тиккусса азарханалул (Луганская окружная больница) чулийнмай бавчуру. Жу барчаллагьрай хьунабавкьунав хъунама хIакиннал , гацIана бувсуна даврил иш-тагьарданиягу. Жун яла отделениялул ца палата ккаккан бувна мина дишин. Хъирив кьини кIюрххил, махъми хIакинтуращалгу кIул бувну, жугу зий байбивхьуру.
Аьмну азарханалул даву ххуйсса даражалийн гьаз дурну дия. Операция бувансса оборудование дия, къюкIлийгума операция буван аьркинмунил дузалшинна дия. Щавурду дирминналсса, цIунцIияртту хьуминналсса буллансса тагьарданийн бувцуну бия азархана. КIива гьантлува дяъви къизгъинний гьуртту хьунсса сант дагьуна, щавурду дурминнан эвакуация дуван. Попасное тIисса кIанттухлусса талатаву дия. Дяъвилул къизгъинсса кIанттурдая 5-7 километралул манзилданий­сса учреждениялий зий буссияв, бивщуминнан цалчинсса кумаг буллай. Щавурду дирминначIан бронировать дурсса техника (МТЛБ) гьан дурну, ми гьаз бувну, жучIан биян бувайва. Шиккува бусанна ВСУ-лул, яни муттаэтурал ярагъуннил щавурду дир­сса укунмасса агьалигу бувцуну букIлай бивкIшиву. Тиккува­сса кIанттул хIакинтал бацIансса чIун дакъа зий аьдат хьуну бия. Тай циняв вирттал бия. Тукунсса режимрай зий бивкIун бия мяйра шинал мутталий. ЧIявуми пишакартал оьрмулул къажагьил­сса бия. Жагьилтал я хъуни­сса шагьрурдайн бивзун бия, ягу Аьрасатнавун. Мунияту шаппай биянсса чIуннагу да­къасса хIакинтал жу бучIаврия ххарину бия, кумаграй рязину бия. Тикку уссаксса хIисав хьунни ттула дакIнивун бюххансса ишругу. Луганскалий бикIу, жу зий бивкIсса кIанай бикIу, циняв пишакартал хъинну бавкьуну, кувннал кув бувгьуну, кувнначIан кув кумагран лечлай зий бия. Цума ци къуллугърайсса ухьурчагу, статусру личIи дакъа, ца кулпат кунма. Душру талатаврил майданнивминнан водительтурайхчIин нацIу-кьацIурду тIайла дуккан­сса хIарачатрай бия, тайннан цуксса захIматну буссарив бувчIлай. КIилчин тамаша бивзмур, щавурду дирми, цуксса къювурдай бухьурчагу, цIунцIу бакъа, цIуру-кIуру бакъа, яхI буллалисса бия. ЦучIав, гьуя-гьарай тIий, ссугайсса, дяъвайсса акъая. Жун гьарманан шайссаксса кумаг буван ччай бия. Циван чирча, тай жагьилтал жул арсурваврал оьр­мурдавусса бия. Шамилчингу, ттул цукунчIавсса щак ба­къая жулва саллатI цIими бусса бушиврий. Ттунма ккавккунни агьалинал оьрмурду ххассал буваншиврул цалами жанну харж дуван хIадурну бушиву. Цимилагу жучIан бувцуну бувкIунни, подваллаву ва землянкардаву бивкIун, жуламиннал ххассал бувсса инсантал. Ми буслай бия саллатIнал цивппа ххассал буван бувсса хIарачатрая. Цаятура лирккун, лахханмур дуллай, бякъин къабитан, цалва спальный мешок буллусса ишир­ттая. Жулвами гьакссагу лайкьну, къириятрай къуццу тIий бия. Таксса талатавуртту къизгъин­сса кIанттурдай, щинаву чавахъру кунма, дирину, тивталну щуруй бия. Тай жагьилтал шагьрулуву ккаккарча, зун щаквагу къабагьантIиссар тайннаву жагь пулеметчик, жагьгу снайпернал ккуллалул вяралул хьхьичIа инсан ххассал уллалисса санинструктор ухьунссар тIий. Жулва вирттал талатаврил майданная ччяни зана хьуннав тIий ура цIуллуну, сагъну.

Ялун ххигу бан. Макьала хIа­дур дурну махъ ХIусман Аьбдулмаликовичлул бувсунни архIал зузиминнащал хъамакъабитулунсса суратру рирщушиву анжагъ личIи хъанахъийни.
Цал коронавирусрал фронт, утти- Украиннавусса дяъвилул ишру. Гьай-гьай, цукунчIавсса иш къабагьаннав, амма ца бала уттигу ялун биярча, яхIлил ва къириятрал саллатI ХIусман ХIусманов ачинтIиссар миккунгу. Балаллул гъаглувун ухьурчагу, цала жандалий хIайп къакуну, цува аьркиннийн. Цаятува кумаг бунийн. ВанацIун цIакь хьуну дур азарданул дяъвилийсса талаталал статус.

Патимат Рамазанова

Заслуженный работник культуры РД

Читайте также: