Апрельданул 13-нний Дагъусттаннал БакIчи Сергей Меликов гьуртту хьунни 2022-ку шинал гъинтнил чIумуцIунсса чартердал программа сакин даврин хас дурсса пресс-конференциялий.
БатIаврий ххал бивгьунни чартердал программарттал ва миннуцIунсса хъунисса туроператортурал виваллил туризмалуву бугьлагьисса кIанттул хIакъиравусса масъалартту. Пресс-конференциялий гьуртту хьунни АьФ-лул Ростуризмалул каялувчи Зарина Догузова, регионнал бакIчитал ва туроператортурал вакилтал.
Виваллил туризмалул ва муницIунсса хъунисса туроператортурал лябуккулуву чартердал программарттал бугьлагьисса кIанттул хIакъираву ихтилат бунни туризмалул федерал агентствалул бакIчи Зарина Догузовал, «ФУНСУН» тIисса туроператорданул директортурал советрал председатель Тарас Демурал, «Интурист» туроператорданул гендиректор Виктор Тополкараевлул ва цайминнал.
Дагъусттаннал туризмалул каширдая бувсунни Сергей Меликовлул. Ванал тIимунийну, Дагъусттан хIадурну бур щалва билаятраясса туристътал хьунабакьин: «Му жун хъуннасса жаваблувшивур ва жу ххарину буру хъамал кIул буван Дагъусттаннащал, вайннал инсантуран ляличIину хъамал ххирашиврущал ва лагмасса ххаллилсса тIабиаьтращал. ЖучIан бучIан бюхъайссар ччимур журалул транспортрай, хIатта бучIайссар велосипедирттай».
