Инвалидшиврул группалуцIунсса цIушинна

Ва гьашинусса шинал июль зурул цанний инвалидшиврул группа ккаккан бувайсса медико-социал экспертизалул (МСЭ) давриву цIусса низам дайдишинтIиссар.

Комиссия буван бучIи буван­тIиссар очнайнугу, заочнайнугу. Яни, цува къашайшала, мушакъатма учIавантIиссар ккаккан дурсса чIумал МСЭ-рал бюрорайн, цува яхъанахъисса кIанттуцIун цIакь бувсса бюрорайн. Заочнайну хъана­хъиссар, мушакъатма цува акъанува, мунал документру поликлиникалия бюрорайн тIайла бувккун. Мяйжанссар, экспертизалийн чара бакъа цува къашайшала тIалав увансса ишругу бикIантIиссар. Агар документирттал тIайлашиврул хъирив лаян къахъанахъисса иш бухьурча, ягу хасъсса оборудованиялул кумаграцIух обследование дуван багьлагьисса иш бухьурча. Ялуннай вара давривугу цаймигу дахханашиннарду хьунтIий дур.

Масалдаран, 2023-ку шинал июнь зурул цанния тийнмай МСЭ цIуницIа буллантIиссар дистанцион кьяйдалий. ЦIуницIа экспертиза буван хьунтIиссар, агар бюрорал бувсса хьхьичIвамур хIукмулия рязи бакъахьурча. Мушакъатма учIан аьркинссар оьвкусса чIумал бюрорайн, тикку ванан кумаг бувантIиссар МСЭ-рал федерал бюрорал ягу хъунмур бюрорал пишакартурайн уккан дистанцион журалий. Ва ялагу. Агар инсан МСЭ-лул хIукмулия къарязину ухьурча, ванал цува яхъанахъисса кIанттайсса бюрорайн очнайну цIусса экспертиза тIалав буллалисса аьрза булун аьркинссар. Инвалидшиврул справка дучIавантIиссар залунначIан почталийхчIин ягу Госуслуги порталданийн. Вай цIушиннардайну экспертизалул даву ххуйсса даражалийн гьаз хьун аьркинссар.