МахIачкъалалив Профессионально-педагогический колледжраву хьунни «Молодежная среда – территория без терроризма» тIисса, Украиннавусса аьрали операциялун хас бувсса жагьилтурал форум.
[dropcap]В[/dropcap]анил сакиншинначину хьунни Дагъусттаннал террорданийн къаршисса комиссиялул аппарат. Форумрай гьуртту хьунни Дагъусттаннал БакIчинал кумагчи, Ухссавнил территориал округрайсса Террорданийн къаршисса комиссиялул аппаратрал вакил Карим Бадруттинов, МахIачкъалаллал администрациялул АТК-лул хъунама Ровшан ХIажибалаев, ДР-лул КIулшивуртту дулаврил ва элмулул министерствалул вакил ГъазимахIаммад Мухумагъазиев, Олимпий тIуркIурдал призер МахIаммад Ибрагьимов, А. Аьлиевлул цIанийсса СШОР-данул директор, лачIун буккаврил Европанал ва дунияллул чемпионатирттал призер МахIаммад ИсяхIажиев, республикалул колледжирттал вакилтал ва студентътал.
Форумрал даву най дия мукьва майданний. ТIиртIуну дия ДР — лул Спортрал министерствалул музейрал выставкартту, спортрал ва воркаут -площадкартту, мукунма ярагъ батIлатIисса площадка. Шикку студентътураща бювхъунни цIанихсса спортсментуращал хьунабакьин, цIухху-бусу бан.
Хъирив цинявппа бавтIунни колледжрал актовый залданувун. Шикку студентътурал хьхьичI ихтилат бунни Карим Бадруттиновлул. Украиннаву ивкIсса журналист, Координациялул информационно-культурный центрданул каялувчи Мухтар Амировлул бувсунни Украиннаву дяъви нанисса кIанттурдайсса тагьардания, Мариуполлал агьулдания. Ихтилатру бунни Мариуполлаясса Ольга Павленкол ва ванил душ Оксанал. Вайннал бувсунни тийх Украиннал радикалтурал дуллалисса гъургъазардая.
