Вай гьантрай МахIачкъалалий хьунни ДР-лул БакIчиначIасса граждан обществалул ва инсантурал ихтиярду хьхьичIуннай даврил Советрал заседание.
Заседаниелул даврий, ларгсса 2021 шинал дурсса даврил хIасиллая бувсунни Советрал председатель Зикрулла Илиясовлул.
Цала ихтилатраву кIицI лавгунни, Дагъустаннал граждан обществалул институтру хьхьичIунмай баву ва инсантурал ихтиярду дуруччаву мурадрай тамансса давуртту дуршиву. Республикалул БакIчинал Советрал члентуращал хьусса хьунабакьавурттай ккавккун бивкIсса маслихIатру ва тIалавшиннардугу дузрайн дуккан дуршиву. Махъсса шиннардий Аьрасатнал личIи-личIисса шагьрурдайсса дуснакьирттавун ва изолятордавун бавкьусса дагъусттанлувтурал ихтиярду ссуссукьу дуллалисса ишру хIисав хьушиву.
[dropcap]М[/dropcap]уницIун бавхIуну, Советрал члентал бувкуссар вай инсантурал ихтиярду дуруччаву ва укунсса ишру дащуй бишаву мурадрайсса аьрзиращал. Советрал мукунма, къулагъасрайн лавсун бур ва ялув бацIлай бур муниципал образованиярттал районнал каялувчитурал инсантурал ихтиярду ссуссукьу хьун къаритаврил масъалартту. Вай масъаларттал хIакъираву ларгсса шинал Советрал члентурал кумаграйну, ЦIунтIиял районналул бакIчинал ва Гутатлиял школалул директорнал дянивсса къалмакъал маслихIатрайн дурцун дур. Му бакъассагу, Советрал члентураща бювхъуну бур 1-мур группалул инвалидтуран ва мушакъатсса оьрчIру бусса кулпатирттан хIукуматрал чулухасса кумагру тIалав бан. Советрал члентурал хIарачатрайн бувну, укунсса оьрчIру бусса кулпатирттан дуллуссар къатри машан ласунсса соцвыплатраду.
Дагъусттаннал районнайгу Советрал кьамул буллай бивкIссар личIи-личIисса масъаларттал хIакъираву букIлакIисса агьали.
Граждан обществалул ва инсантурал ихтиярду дуруччаву мурадрайсса ххуллу-чаранная бусласисса ихтилатру бунни Советрал член, «Центр исламских исследований Северного Кавказа» АНо-лул директор Руслан Гереевлул, Советрал член, Дагъусттаннал профсоюзирттал организациялул председатель Аьбдуллагь МахIаммадовлул ва м. ц.
Дагъусттаннал Граждан обществалул ва инсантурал ихтиярду хьхьичIуннай давриха зузисса Совет сакин бувния шинмай, кIицI лагансса давуртту дунни Дагъусттаннал культуралул зузалтрал профсоюзирттал комитетрал председатель Марзижат Бутаевал. Ванил бувсунни, Советрал президиумрал член хIисаврай, гьуртту хьушиву инсантурал ихтиярду дуруччаву, ялун нанисса ник патриот зумувну тарбия даву ва инсантуран цала ихтиярдая кIул баву мурадрайсса конференцяирттал, ккуркки столлал ва цаймигу мероприятиярдай.
Заседаниелул даврил хIасиллу дуллай, Зикрула Илиясовлул кIицI ларгунни ДР-лул БакIчиначIасса граждан обществалул ва инсантурал ихтиярду хьхьичIуннай даврил Совет сакин бувну 20 шин шаврин хасну дантIисса мероприятирдая.
