Жулла канилу къачансса затру дикIай, жува гай ца ишираву ишла дуллай аьдатну бунугу, цаймигу цимивагу ишираву ишла дуван бучIисса. ХIакьину бусанну мукунминнувасса цанния – оьрчIал присыпкалия. ЦIагу оьрчIал духьувкун, жува аьдатну буру ва порошок мюрщултрал бурчу буруччавриву ишла буллай. Ххал барча, присыпка ичIувагу, ахъувугу цимивагу ишираву аьркин буван бюхъайсса бур.
Синттул катIри бигьану ликканшиврул
Хъунмасса хIаллай аьрщараха зун нанийни, каруннил бурчу зия къахьун, жура синттул катIри лаххару. Амма жунма кIулли ми лаххангу, ларххун махъ, хъартсса карунния ликлангу къатIааьнну бикIайшиву. Ва ишираву бигьашиву хьунтIиссар, лахлан хьхьичI синттал катIравун чан-чанну присыпка бичирчан.
Каруннай кьуртти
къахьуншиврул
Аьрщараха зузийни чIатIа ва цамургу захIматрал ярагъ канил бувгьуну, карунний кьуртти, мозоллу къахьун, кару дахьрасса присыпкалувух дуккан аьркинссар. Кару, гьухъагу къаритлай, ярагъуннил кIюйлийх бигьанна ччех дикIлантIиссар, каруннай кьурттигу къахьунтIиссар. КарунницIун аьрщи ва цамургу чанну лачIлантIиссар.
Ххяххиярттал
къаралданий бацIаншиврул
Газондалийсса уртту дикIу, ахъувусса ххяххияртту дикIу канакисса ущу-щулгъи нигьа бусайссар присыпкалия. Агарда хIал бакъа, меж диркIун чIалачIисса ххяххияртту духьурча, бичияра миннуйн присыпка. Сагъ-саламатну чIалачIисса ххяххиярттайнгу, профилактика, ущу-щулгъилуясса буруччаву мурадрай, присыпка бичаврия, хайр бакъа, зарал бакъассар. Амма хъамамабитари ларчIсса гъаралунния махъ присыпкалия цичIар къаличIайшиву.
БитIикьукьулт бакъа буваншиврул
Дачниктуран къаххирар битIикьукьулт вайннул цалва хъирив тлягу кIункIу бувайну тIий. БитIикьукьултгу, тлягу нигьа бусайссар присыпкалия.
ТIутIал мархри
бурувччуну личIаншиврул
Чимусуха лавхьхьусса мархри (луковицы) бувгьуну дугьайсса тIутIацIун бакьайссар присыпка. Кьуцурттуву мугъаятну, гъакъагъанну, бивхьуну тIутIал луковицарду, мивунма бивчуну присыпкагу, барт бавхIуну ягу цIакьну бувгьуну, цал-кIил ла-ялун кIура баен бувара, присыпка саргъунну мархрайн бияншиврул. Укун присыпкалувух бувккун бувгьусса мархри аьллан къабикIайссар, крахмал хIаласса затру къаххирасса зиянчитуралгу вай кьурщу къабантIиссар.
Дургьумур
дуруччиншиврул
Хъатру чIяру хьуну, ягу цамур багьаналийн бувну, дургьумунил мархри къааьллан кумаг шайссар аьрщаравусса ххишаласса хъатру цивунна ласунтIисса присыпкалия. Мунийн бувну, рассада дугьлагьисса чIумал, ягу хIави бугьлагьийни, дугьлагьимунил мархрайн присыпка пурх учаврия мюнпат хьунтIиссар.
ЧчаннацIа тIааьнсса кьанкь дикIаншиврул
Жунма кIулли, аьрщараха зузийни, ахъувун нанийни лаххайсса синттал усру щин къадуххайсса дикIайшиву ва вайннуву ччанну цайми уссавунияр ххишалану гьухъа битлай бикIайшиву. Синттул уссавун бивчусса присыпкалия кумаг хьунтIиссар ччанну ччяни гьухъа къабитан. УссацIа ва ччаннацIагу тIааьнсса кьанкь дикIантIиссар.
